PEACE CUP:Police FC yari ifite igikombe irasezerewe, APR FC na Rayon Sports muri 1/4

7

Kuri uyu wa gatatu tariki 22 Kamena 2016 hakinwaga imikino ya 1/8 cy’igikombe cy’Amahoro aho ikipe ya Police FC yari ifite iki gikombe yasezerewe itarenze umutaru ari nako APR FC na Rayon Sports nyuma yo kuba zihanganiye igikombe cya shampiyona zerekanye ko n’igikombe cy’Amahoro zigishaka zombi.

Ni imikino yose yabereye umunsi umwe, aho APR FC yakiraga Bugesera FC naho Rayon Sports ikaba yari yakiriye Marines FC maze aya makipe anahatanira igikombe cya shampiyona birayahira yose yitwara neza.


Kwizera Pierro niwe watsindiye Rayon Sports ibitego 2.

Umukino wa APR FC yakinaga na Bugesera FC ikipe ya APR yaje gutungurwa hakiri kare mu gice cya mbere Bugesera FC iyitsinda igitego ndetse n’igice cya mbere kirangira ari 1 cya Bugesera ku busa bwa APR FC.

Igice cya kabiri ikipe ya APR FC yaje isa niyariye amavubi maze icurika ikibuga ku munota wa 15 Mugenzi Bienvenue abonera iyi kipe igitego cya mbere, nyuma y’iminota itageze kuri 5 Bigirimana Issa yashimangiye intsinzi ya APR FC atsinda igitego cya 2.


Pierro watsinze ibitego niwe wari kapitene Bakame usanzwe ari kapitene n’uyu munsi ntiyakinnye.

Uyu mukino wagaragayemo ikarita y’umutuku yahawe umukinnyi wa Bugesera FC ariwe Ntwari Jacques.

Ku rundi ruhande benshi bari biteze imvura y’ibitego igomba kugwa ku kibuga cya Kigali (Stade Reginal Nyamirambo) aho Rayon Sport yakinaga na Marines.

Ikipe ya Rayon Sport yari yanatangiye itanga ibimenyetso by’uko ishobora kuza kubatiza Marines nk’uko yabimenyereje andi makipe aho igice cya mbere cyarangiye ifite ibitego 2-0 byose byatsinzwe na Kwizera Pierrot byose kuri kufura.

Igice cya kabiri cyatangiye benshi bazi ko Rayon Sports igiye kongera umubare w’ibitego ariko siko byaje kugenda hahise habaho impinduka ikipe ya FC Marines yinjizamo kabuhariwe wabo Itangishaka Blaise wari wabanje ku ntebe ndetse aza no kugora ikipe ya Rayon Sports bigaragara aza no kubishyura igitego kimwe maze umukino urangira ari ibitego 2 bya Rayon Sports kuri 1 cya Marines FC.

Si iyo mikino yabaye gusa kuko ikipe ya Mukura VS yatunguwe na Gicumbi irayisezerera iyitsinze ibitego 2-1, mu gihe Police FC yari inafite iki gikombe itahiriwe na 1/8 kuko yasezerewe n’Amagaju FC kuri penaliti nyuma y’uko amakipe yombi yari yanganyije ubusa ku busa maze bageze mu mapenaliti Amagaju atsinda Police FC penaliti 6-5 .

Dore uko imikino yose ya 1/8 cy’igikombe cy’amahoro yagenze.

Police FC 0-0 Amagaju FC(Police FC yaviriyemo kuri penaliti)
Rayon Sports 2-1 Marines FC
Isonga FC 0-1 AS Muhanga FC
APR FC 2-1 Bugesera FC
SC Kiyovu 1-0 Sunrise FC
Espoir FC 2-0 La Jeunesse FC
Gicumbi FC 2-1 Mukura VS
Entincelles FC 0-1 AS Kigali

Biteganyijwe ko imikino ya 1/4 y’ikombe cy’Amahoro izaba kuri uyu wa gatandatu tariki ya 25 Kamena 2016.

Dore uko amakipe azahura muri 1/4

APR FC vs SC Kiyovu
AS Muhanga vs Espoir FC
Rayon Sports vs Gicumbi FC
Amagaju FC vs AS Kigali

Yisangize Inshuti.

Ibitekerezo 7

  1. APR FC niyo kipe tugira mu rwanda gusa kbs kuko ni gikombe cyamahoro ni cyacu kuko kubona dukinisha abasimbura nabo bakabikora ni ukuvuga ikipe iteguye

Tanga Igitekerezo