Ntabwo ndi Imana, ndi umutoza ufite intego - Kanyankore nyuma yo gutsindwa

Umutoza w’ikipe ya APR FC Kanyankore Gilbert Yaounde aremeza ko ikipe ye kuba itaramenyerana ari imwe mu mpamvu yatsinzwe kandi ko we atari Imana yo guhita ikora ibyo abantu bifuza n’ubwo ngo ari umutoza ufite intego.

Kanyankore Gilbert Yaounde yatakaje umukino wa mbere yatozaga APR FC ubwo yatsindwaga na Ulinzi yo muri Kenya mu mikino ya gisirikare iri kubera mu Rwanda. Kanyankore yavuze ko ikipe ye itaramenyerana kuko yiganjemo abakinnyi bashya gusa.

Uyu mutoza yavuze ko atari Imana ngo ahite abikora uko bigomba ariko na none yizeza abakunzi ba APR FC ko mu minsi iri imbere bagiye gutangira gutsinda.

Umukino ukirangira Kanyankore yagize ati:”Ntabwo ndi Imana, ndi umutoza ufite intego, intego rero si ubwa mbere mbacira umugani ariko uteye insina uyu munsi ejo ntiwajya gusarura igitoki, mwihangane tuzatsinda imikino ikurikira, tuzatsinda muri shampiyona jyewe ndabyizeye.”

Kanyankore Gilbert Yaounde yahawe akazi ko gutoza ikipe ya APR FC mu kwezi gushize kwa Nyakanga ahabwa intego zo kubaka ikipe itsinda ariko yakinnye neza.

Kanyankore aheruka mu Rwanda atoza Kiyovu Sports yaje kuvamo yirukanwe kimwe na Rayon Sports yari yabanjemo nayo ikamwiruka.

Kanyankore ariko yubakiye amateka muri AS Kigali ikitwa Les Stadins ndetse n’I Burundi mu ikipe ya Vital’o yahesheje igikombe cya CECAFA cya mbere mu mateka yayo atsinze APR FC ku mukino wa nyuma.

Yisangize Inshuti.

Ibitekerezo

Tanga Igitekerezo