Nta kipe yo hanze yitabiriye irushanwa ryo kwibuka Padiri Kayumba

Irushanwa rya Volleyball ryo kwibuka ku nshuro ya 7 Padiri Kayumba Emmanuel ryitabiriwe n’amakipe yo mu Rwanda gusa nyamara hari imyaka ryagiye ryitabirwa n’andi makipe avuye hanze y’u Rwanda.

Iri rushanwa ryo ku nshuro ya 7 ryabaye taliki ya 18 na 19 Gashyantare, ribera muri GSOB (Groupe Scolaire Officiel de Butare) ryegukanywa na Kirehe VC itsinze UTB VC yahoze yitwa RTUC amaseti atatu ku busa ( 17-25, 21-25,16-25) mu rwego rw’amakipe y’icyiciro cya mbere mu bagabo.


Umutoza Nyirimana Fidele utoza Kirehe akomeje gutwara ibikombe aho agiye hose

RRA WVC (Rwanda Revenue Authority Women Volley Club) yongeye kwisubiza igikombe mu rwego rw’abagore itsinze ku mukino wa nyuma Ruhango WVC amaseti atatu ku busa.


Ikipe ya RRA WVC ikomeje gutwara ibikombe hafi ya byose bikinirwa mu Rwanda mu rwego rw’abagore

Mu makipe asanzwe icyiciro cya 2 hashoboraga kwiyongeramo n’andi abifitiye ubushake n’ubushobozi igikombe cyegukanywe na GSOB VC itsinze PSVF VC (Petit Seminaire Virgo Fidelis de Karubanda) amaseti atatu ku busa.

Mu basheshakanguhe igikombe cyatwawe na Relax VC isanzwe yitoreza ku kimisagara, aho ku mukino wa nyuma yatsinze Mamba VC amaseti atatu kuri abiri.
Padiri Rwirangira Pierre Celestin uyobora GSOB ariyo itegura iyi mikino yo kwibuka Padiri Kayumba Emmanuel wayiyoboye igihe kitari gitoya, avuga ko bari bifuje ko iri rushanwa ryakwitabirwa n’andi makipe avuye hanze y’u Rwanda ariko ngo ntibyakunze.

Ati “ twatumiye amakipe y’i Burundi ndetse hari n’umwe mu bayobozi ba Volleyball mu ikipe imwe y’i Burundi wari waje kureba iri rushanwa, ariko kubera ibibazo bafite ntibyakunze ko ayo makipe aza, naho mu bindi bihugu nka za Kenya hari abatubwiye ko bibatunguye nta gihe gihagije bafite cyo kwitegura kuba bakwitabira” Padiri Rwirangira.

Uyu mupadiri avuga ko nko ku kibazo cyo gutinda bazagerageza bakabikosora ubundi irushanwa rikarushaho kwaguka.

Padiri Rwirangira uyobora GSOB

Uko amakipe yahembwe

Mu bagabo/ ikiciro cya mbere
3. APR VC yahawe 100.000RWF n’umupira wo gukina
2. UTB VC yahawe 150.000Rwf n’imipira 2 yo gukina
1. Kirehe VC yahawe 200.000 Rwf n’umupira wo gukina

Abagore

3. APR WVC yahawe 100.000RWF n’umupira wo gukina
2. Ruhango WVC yahwe 150.000Rwf n’imipira 2 yo gukina
1. RRA WVC yahawe 200.000 Rwf n’umupira wo gukina

Abagabo/ikiciro cya 2

3. WASAC VC yahawe 100.000RWF n’umupira wo gukina
2. PSVF VC yahawe 150.000 Rwf n’imipira 2 yo gukina
1. GSOB VC yahawe 200.000 Rwf n’umupira wo gukina

Relax VC yatwaye igikombe mu basheshakanguhe yahawe igikombe na 50.000Rwf .
Padiri Kayumba Emmanuel yitabye Imana mu 2009 yayoboye ikigo cy GSOB igihe kirekire ndetse abo yareze bose bavuga ko hari byinshi yabigishije bakigenderaho mu buzima busanzwe ndetse n’ubwa Sports, ikindi yibukirwaho ni uko yari yarashyizwe muri Komisiyo y’igihugu y’ubumwe n’ubwiyunge.

Yisangize Inshuti.

Ibitekerezo

Tanga Igitekerezo