Maso, umutoza wungirije wa Rayon Sports ntiyumva impamvu bahagaritse Masudi

5

Umutoza Masudi na Maso

Umutoza wungirije w’ikipe ya Rayon Sports Nshimiyimana Maurice (Maso) yavuze ko nta kibazo yigeze agirana n’umutoza Masudi Djuma .

Umutoza Masudi Djuma yahagaritswe imikino ibiri mu ikipe ya Rayon Sports, ikipe ubu iri gutozwa n’umutoza wari usanzwe wungirije Nshimiyimana Maurice (Maso).

Uyu Maso akaba yaraye akinnye umukino wa mbere nk’umutoza mukuru atsinda Rugende FC ibitego 3 ku busa mu gikombe cy’Amahoro.

Ubuyobozi bwa Rayon Sports mu ijwi rya Gakwaya Oliviier umuvugizi akaba n’umunyamabanga wayo bwavuze ko bwahagaritse Masudi kuko asuzugura abatoza bamwungirije.

Ibi ariko byahakanywe n’umutoza wungirije Nshimiyimana Maurice wavuze ko nta kibazo yari afitanye na Masudi kandi ko bakoranye neza.

Ati :” Ngira ngo njye na Masudi twakoranye neza n’ubu nta kibazo kirimo mu mikoranire yacu. Ngira ngo ibaruwa imuhagarika bayinyeretse mu gitondo. Njyewe rero nka Maurice ku giti cyanjye twakoranye neza uretse ko itsinda ry’abatoza (staff technique) rigizwe n’abantu benshi. Njye ku ruhande rwanjye twakoranye neza, twasangiye byose, twashakanye amanota kandi iyo dukorana nabi ntabwo twari kubasha kugera aho tugeze muri shampiyona.”

Maso yavuze ko ibyo Gakwaya yavuze yabivuze ku giti cye ariko kandi avuga ko ibyo Masudi aregwa byo kutumva inama z’abatoza bamwungirije atari ikosa ngo kuko agomba gufata icyemezo nk’umutoza mukuru.

Ati "Ibyo umuyobozi yavuze ajya kubivuga yabivuze ku giti cye nanjye ibyo mvuze mbivuze ku giti cyange . Kandi umutoza mukuru ni we ukuriye staff(itsinda ry’abatoza) niwe mukuru, ni we uba ufite ijambo rikuru ibitekerezo byacu sinangombwa ngo abyumve ashaka yanabireka kuko niwe mukuru ni nawe uba ugomba kubibazwa.”

Maso ariko yavuze ko ibyo bagomba kubyirengagiza bagashyira imbere icyatuma babona amanota yo muri weekend ku mukino wa shampiyona uzabahuza na Musanze FC.

Yavuze ko atasigaranye ikipe wenyine ngo kuko afite abandi bari gufatanya kandi ko bafite abafana ndetse n’abakinnyi babari inyuma.

Yisangize Inshuti.

Ibitekerezo 5

  1. Masudi afunga mumutwe cyane ahubwo maso amutara umwanya kuko nawe ndabona akora neza cyane

  2. Masudi afunga mumutwe cyane ahubwo maso amutara umwanya kuko nawe ndabona akora neza cyane

Tanga Igitekerezo