Mashami yahaye Rayon Sports amahirwe yo gutsinda umukino uzabahuza

4

Umutoza w’ikipe ya Bugesera FC Mashami Vincent yemeje ko abona Rayon Sports ariyo ifite abahirwe yo gutsinda umukino bafitanye ijana ku ijana n’ubwo ngo na bo biteguye.

Kuri uyu wagatandatu ni bwo aya makipe afitanye umukino. Uzaba ari umunsi wa gatandatu wa shampiyona y’u Rwanda. Ni umukino uzabera kuri sitade ya Kigali i Nyamirambo.

Rayon Sports kugeza ubu ni ikipe ikomeye iyoboye urutonde rwa shampiyona n’amanota 13 ikaba itaratsindwa igitego kugeza ubu ndetse ni na yo kipe imaze kwinjiza ibitego byinshi (icyenda).

Bugesera FC na yo ni ikipe ikomeye ifite abakinnyi bakomeye kandi bazwi baciye mu makipe akomeye. Ukurikije amazina yo muri aya makipe yombi uyu ni umukino byanze bikonze uzaba ukomeye.

Gusa Mashami umutoza wa Bugesera FC we abona Rayon Sports ariyo ifite amahirwe yo kuwutsinda ngo kuko ikomeye kuva umwaka ushize.

Ati:”Rayon Sports ni ikipe nziza kandi n’umwaka ushize ni ikipe yarangije ihagaze neza. Ni ikipe navuga ko izaduha akazi gakomeye, ni ikipe navuga ko twayiha amahirwe yose yo gutsinda umukino ariko natwe navuga ko twiteguye uretse utubazo duhari bitewe n’ihindagurika ry’ikirere ari ko navuga ko kuwa gatandatu hazagera abakinnyi bose bameze neza.”

Mashami avuga ko kuva Masudi yafata Rayon Sports ari ikipe yahindutse ati:”Aho imaze gufatirwa n’umutoza Masudi ubona ko hari ikintu kimaze guhinduka n’abakinnyi umwe ku wundi ni abakinnyi beza.”

Nshimiyimana Maurice, umutoza wungirije muri Rayon Sports na we avuga ko umukino wa Bugesera bawiteguye neza. Ati:” Ngirango umukino tuwiteguye neza, ni umukino tuzakinira hano i Kigali buri munsi dutegura umukino bitewe naho tuzakinira kandi n’ikipe tuzakina muri rusange rero nkurikije uko imyitozo imeze navuga ko turi kwitegura neza.”

Imikino yose iteganyijwe ku munsi wa gatandatu wa shampiyona y’u Rwanda
23/11/2016

AS Kigali 1-0 Gicumbi
26/11/2016
Rayon Sports vs Bugesera Fc (Stade de Kigali)
Espoir Fc Vs Mukura VS (Rusizi)
Marines Fc vs Amagaju Fc (Stade Umuganda)
Pepiniere Fc vs APR Fc (warasubitswe wimuriwe 14/12/ 2016)
27/11/2016
Musanze Fc vs Police Fc (Nyakinama)
Kirehe Fc vs SC Kiyovu (Ngoma)
Etincelles Fc vs Sunrise Fc (Stade Umuganda)

Yisangize Inshuti.

Ibitekerezo 4

  1. Bugesera iratsindwa uyu munsi ibitego bibiri kimwe pierrot and kamara mu gice cya mbere byombi.

Tanga Igitekerezo