Kwizera Olivier arashinja APR FC kugambirira kumwicira impano

3

Umuzamu w’ikipe ya APR FC Kwizera Olivier arashinja iyi kipe gushaka kumwicira impano kuko hari bamwe mu bayobozi bayo bashaka ko yirukanwa ariko abandi bagashaka ko ajya muri Afurika y’Epfo.

Olivier amaze iminsi arwana intambara yo kubona ibyangombwa byo kwerekeza muri Afurika y’Epfo. Ibi ariko byaje bikurikirwa no kwirukanwa n’ikipe ya APR FC ubwo yari ari mu myitozo akabwirwa ko atemerewe gukorana n’abandi imyitozo.

Kuri uyu wa kabiri ni bwo amakuru yiriwe azenguruka ko uyu musore ashobora guhabwa ikipe ya Vision yo mu cyiciro cya kabiri kuko ariyo yamureze ndetse ikaba ari nayo izahabwa ibaruwa imwemerera kujya mu yindi kipe (realese letter).

Uyu musore ariko we avuga ko atabyemeye kuko ahubwo ngo harimo gushaka kumwicira impano kuko we atakina mu cyiciro cya kabiri kandi ko akwiye kuba ari we uhabwa urupapuro rumwerera gusohoka muri iyi kipe (realese letter) aho kuyiha ikipe ya Vision.

Ati:” Kubera iki bumva ko bayiha Vision? Kuki batayinyihera ahubwo bagira ngo bice impano yanjye. Ahubwo vuga ngo APR harimo igikundi kimwe cyifuza ko jyewe banyirukana hakaba n’igikundi kindi kifuza y’uko jyewe nagenda(Afurika y’epfo)”

Umunyamabanga w’ikipe ya APR FC Kalisa Adolphe Camarade avuga ko uyu musore bamutijwe n’ikipe ya Vision kandi ko icyo bajya gukora cyose bagomba kuyimenyesha.

Ati:”Twebwe tumufiteho uburenganzira bwose ariko tubanza kumenyesha ikipe yaturutsemo, ni uwabo twebwe twubaha ikipe umukinnyi aba yaraturutsemo, ntabwo turi nka babandi....”

Camarade yongeraho ko uyu musore kuba baramutijwe na Vision ariyo mpamvu n’impapuro zimurekura ikwiye kuzihabwa.

Ati:” No, cyeretse iyo wamuguze, twebwe rero twaramutiye, icyo ng’icyo ntikiramenyekana (icyobazamukoza) ariko erega arimo arashakirwa ikipe yo hanze birazwi . Ariko erega nta n’itegeko dufite ryo kuyimuha(release letter) dushaka twanayimwima”

Olivier avuga ko yakuriye mu makipe menshi arimo Vision , La Jeunnese n’ishuri rya APR yamazemo ibyumweru bibiri. Ari naho ahera yemeza ko nta burenganzira Vision imufiteho bwo gufata urupapuro rumwerera gusohoka muri APR FC.

Hagati aho Olivier aracyategereje Visa ngo yerekeze muri Afurika y’Epfo.

Hagati aho kandi umutoza Kanyakore Gilbert Yaounde yabwiye itangazamakuru ko uyu musore batamukeneye mu myitozo ko akwiye kubanza gushaka ibyangombwa hanyuma , ibyo kujya hanze byakwanga bakazareba niba bamukeneye nyuma y’imikino ya gisirikare.

Yisangize Inshuti.

Ibitekerezo 3

  1. Kwizera yadukoreye byiza sinibaza impamvu batamuha agaciro.ese uyu wirata ngo aratoza we nitumwirukana azajya kuzererahe?muri APR FC nta kamara ubamo mwese mwitonde.

  2. Nabandi birukira murine Apr nibarebereho ubundi c muyobeweko Apr yica umupira nimpano zabanyarwanda bakiri bato hari uwavuz engo ninkagereza barammutuka avuyye mwisonga ariko yavuze ukuri

Tanga Igitekerezo