Abakinnyi bakanyujijeho mu Mavubi bagiye kongera guhangana n’Abagande I Kigali

5

Abakinnyi bahoze bakinira ikipe y’igihugu y’u Rwanda Amavubi bagiye gukina umukino wa gishuti n’abahoze bakinira ikipe ya Uganda, kimwe mu bihugu bifatwa nka mukeba w’u Rwanda mu mupira w’amaguru.

Uyu mukino uteganyijwe kuri uyu wa kane tariki ya 30 Kamena 2016 kuri Stade Amahoro, aho uzaba uhuriyemo bamwe mu bakinnyi bubatse izina mu mupira w’aka karere ku ruhande rw’u Rwanda barimo Jimmy Mulisa, Karekezi Olivier, Katauti Hamadi Ndikumana, Said Abedi Makasi, Ntaganda Elias, Eric Nshimiyimana, Karim Kamanzi, Nkuzingoma Ramadhan n’abandi.

Ku ruhande rw’abagande na bo bazaba bafite abakinnyi bubatse izina mu myaka yshize haba mu ikipe y’igihugu no mu mashampiyona yo muri aka Karere harimo n’iy’u Rwanda nka Sam Kawalya, James Odoch, George Ssemwogere, Hassan Mubiru, Abubakar Tabula, Joseph Mutyaba,Kefa Kisala, David Obua, Andy Lule, Vincent Kayizi, Johnson Bagole, Philip Ssozi, Hakim Magumba n’abandi.

Uyu mukino ufite intego yo guhuza abahoze bakina ruhago hano mu Rwanda bagamije gukora igisa nk’ihuriro bityo kugira ngo bafashe abashinzwe ruhago mu Rwanda kuyizamura nk’uko Munyaneza Ashraf Kadubiri yabishimangiye.

Kadubiri yemeza ko uyu mukino ari wo bazaheraho bakora ihuriro ry’abigeze gukinira ikipe y’igihugu Amavubi bityo bakanakomerezaho gutegurira n’abagikina ubu. Yemeza ko iri huriro rizafasha kuzamura umupira w’amaguru mu Rwanda uhereye hasi mu bana bato.

Uyu mukino ariko uzaba ufite n’intego yo gufasha abahoze bakina ruhago batabayeho neza, imiryango y’abahoze bakina umupira w’amaguru bitabye Imana ndetse n’abarokotse Jenoside batishoboye nk’uko Mulisa Jimmy yabitangaje.

Ati:” Uyu mukino ushobora no kudufasha tukareba uko twafasha bagenzi bacu twakinanye ubu batameze neza. Murabizi mubabona usanga umuntu yarambaye umwenda w’ikipe y’igihugu Amavubi ariko usanga abayeho nabi ubwo rero mu mafaranga azava muri uyu mukino tuzabafasha."

Yakomeje agira ati: "Ikindi hari abantu bapfuye mu bo twari kumwe, nk’umutoza Ntagwabira, tugize Imana abantu bakaza ari benshi amafaranga twakuramo n’umuryango we twawufasha. Ikindi muzi ko ubu turi mu bihe byo kwibuka ubwo rero nitubonamo amafaranga ahagije tuzareba imfashanyo dutanga ku barokotse Jenoside batishoboye.”


Abenshi muri aba bazaba bari muri uyu mukino

Uyu mukino uzitabirwa cyane n’abakinnyi bari mu ikipe y’igihugu yatsinze Abagande mu mwaka 2003 ubwo bombi bashakaga itike yo kujya mu gikombe cya Afurika cya 2004, aho byarangiye u Rwanda ari rwo rubonye iyo tike. Hazaba harimo kandi abandi bakinnyi bakinnye muri CAN ndetse n’abakinnye mu myaka yo hambere

Karekezi Olivier na we mu kiganiro n’abanyamakuru yavuze ko hari abantu benshi bashimishije abanyarwanda mbere ya Jenoside, bityo ngo nabo rero bakaba bogomba gukina uyu mukino.

Kugeza ubu hashyizweho komite izayobora abandi gukomeza gutegura gushyira hamwe kw’abakinnyi bahoze bakinira Amavubi kugira ngo batange umusanzu wabo muri ruhago nyarwanda. Iyi komite iyobowe na Nshimiyimana Eric nka Perezida, Visi Perezida wa mbere ni Munyaneza Ashraf Kadubiri, Visi Perezida wa kabiri ni Mulisa Jimmy, naho Karekezi Olivier na Katawuti Ndikumana Hamad bakaba abajyanama.

Abakinnyi bazakina uyu mukino ku mpande zombi n’abazabatoza

Ikipe Rwanda: Jimmy Mulisa, Karekezi Olivier, Katauti Hamadi Ndikumana, Said Abedi Makasi, Ntaganda Elias, Eric Nshimiyimana, Karim Kamanzi, Nkuzingoma Ramadhan, Uwimana Abdul, Bagumaho Hamisi, Didier Bizimana, Muhamud Mosi, Nshimiyimana Canisius, Kayiranga Jean Baptiste, Rutagengwa Charles, Gatera Alphonse, Kadubiri Ashraf, Bokota Labama, Runuya, Eric Murangwa, Desire Mbonabucya, Chrisostome, Aloys Kanamugire, Rudasingwa Longin (umutoza ) na Kanyankore Yaounde Gilbert (umutoza ).

Ikipe ya Uganda : Sam Kawalya, James Odoch, George Ssemwogere, Hassan Mubiru, Abubakar Tabula, Joseph Mutyaba,Kefa Kisala, David Obua, Andy Lule, Vincent Kayizi, Johnson Bagole, Philip Ssozi, Hakim Magumba, Obwiny Philip, Joseph Kabagambe, Willy Kyambadde, Fred Tamale, Wasswa Bossa, Dan Ntale na Katerega Muhamod.

Tubibutse ko kwinjira muri uyu mukino ari ukwishyura amafaranga ibihumbi 10 muri VVIP, ibihumbi 5000 muri VIP, ibihumbi 2000 ahatwikiriye ndetse n’amafaranga 1000 ahasigaye hose.

Yisangize Inshuti.

Ibitekerezo 5

  1. Wouowww hari amazina umunti yati akumbuye kumva muri ruhago kbs. Gatere ko atagaragaramo?

Tanga Igitekerezo