Irushanwa ryo kwibuka aba Sportif bazize Jenoside ryagaragayemo impinduka

Amarushanwa yo kwibuka abari aba sportif bazize Jenoside yakorewe abatutsi uyu mwaka, azongerwamo icyiciro cyo gufasha umuryango wacitse ku icumu utishoboye, iki cyiciro kizaza cyiyongera ku rugendo rwo kwibuka ndetse n’amarushanwa aba atandukanye aba muri buri mukino.

Ubusanzwe imihango yo kwibuka abari aba sportif yabaga mu byiciro bibiri, icya mbere ni urugendo rukorwa ruva Kimihururra KBC rwerekeza kuri sitade Amahoro nyuma hagakurikiraho amarushanwa atandukanye ahuza amakipe mu mikino itandukanye.

Uyu mwaka komite itegura iyi mikino iyobowe na Nkurunziza Gustave usanzwe ukuriye ishyirahamwe ry’umukino w’intoki wa Volley Ball, yongeyemo ikindi cyiciro cyo gufasha umwe mu miryango yarokotse Jenoside utishoboye.

Nkurunziza Gustave avuga ko IBUKA na CNLG babahitiyemo umuryango w’abana 4 babana mu nzu imwe mu Karere ka Kamonyi, Umurenge wa Gacurabwenge bahitamo kuba ari wo bafasha. Avuga ko buri shyirahamwe rizatanga inkunga kugira ngo amafaranga yo gusanira iyi nzu aba bana aboneke.

Ati:”Mu Karere ka Kamonyi hari abana 4 baba mu nzu imwe, rero twasanze tugomba kububakira iyo nzu yabo tukayibasanira. Twemeranyijwe ko buri shyirahamwe riba muri komite Olympic rigomba gutanga amafaranga byibura amake ibihumbi 50 hanyuma na komite Olympic na yo izatwongereraho miliyoni imwe ayo ni yo tuzakoresha dusana iriya nzu ya bariya bana.”

Uretse iki gikorwa cyo kuremera uyu muryango, ngo hazakurikiraho amarushanwa atandukanye mu mikino itandukanye. Muri iyi mikino hazajya hatangirwamo ubutumwa bwo ku rwanya Jenoside nk’uko Bugingo Emmanuel ushinzwe imikino muri Minisiteri y’umuco na siporo abivuga.

Ati:”Nta bwo dushaka ko ari imikino iba bikarangira, ahubwo ni imikino dushaka ko ifasha hagatangwa ubutumwa bwo kurwanya Jenoside. Aba sportif nyabo ntibagira amacakubiri, baharanira kuzuzanya, nka bariya tubona bari mu kibuga kugira ngo batsinde ni uko buzuzanya ntibagire amacakubiri.”

Imihango yo kwibuka abari aba sportif bazize Jenoside yakorewe abbatutsi mu 1994, izatangira kuri uyu wa gatanu tariki ya 3 Kamena 2016, ikazatangizwa n’igikorwa cyo gushyira indabo ku rwibutso rwa Jenoside yakorewe abatutsi rwubatse ku Gisozi nyuma hahite hatangira urugendo ruzava KBC rwerekeza kuri sitade ntoya (Petit stade) I Remera.

Yisangize Inshuti.

Ibitekerezo

Tanga Igitekerezo