Irushanwa ryitiriwe Perezida Kagame rishobora guhuzwa n’umushinga wa FERWAFA wibagiranye.

Umuyobozi w’ishyirahamwe ry’umupira w’amaguru mu Rwanda (FERWAFA) Nzamwita Vincent De Gaulle yemeje ko irushanwa ry’Umurenge Kagame Cup rishobora guhuzwa n’umushinga wa FERWAFA wa shampiyona y’abatarengeje imyaka 15 wari umaze gusa nuwibagiranye.

Ibi Nzamwita yabivuze ubwo yahuraga na bamwe mu bayobozi mu ntara y’uburasirazuba muri gahunda amaze iminsi akora yo kuzenguruka intara avugana n’abayobozi ku iterambere rya ruhago mu ntara bayobora.

Aba bayobozi bo mu ntara baganiriye na perezida wa FERWAFA ku bijyanye n’ibikorwa remezo cyane cyane ku masitade arimo nayemewe na nyakubahwa Perezida wa Repubulika Paul Kagame.

Tumwe mu turere duteganyijwe kubakwamo sitade harimo Rwamagana,Ngoma, Nyagatare, Musanze, Gicumbi, Rusizi, na Nyamagabe.

Nk’uko urubuga rwa FERWAFA rubitangaza ngo De Gaulle yanahuye na Minisitiri w’ibikorwa remezo nyakubahwa Musoni James ndetse na Minisitiri w’ubutegetsi bw’igihugu Kaboneka Francis baganira kuri uyu mushinga w’ibikorwa remezo .

Ikindi bavuga ko baganiriyeho ni irushanwa ryitiriwe Perezida wa Repubulika Paul Kagame (Umurenge Kagame Cup) ko ryajya rikinwa n’abatarengeje imyaka 15 kugirango rihuzwe n’umushinga wa FERWAFA yari yariyemeje wo gukora shampiyona y’abatarengeje imyaka 15 ariko ukaba wari umaze gusa n’uwacitse intege.

Abivugaho perezida wa FERWAFA De Gaulle yagize ati:“ twanaganiriye kandi ku isura nshya yirushanwa ngaruka mwaka ry’ Umurenge Kagame Cup rikinwa n’amakipe agera kuri 416. Tuzatanga ubufasha bwa tekinike kugirango rikinwe n’abakinnyi batarengeje imyaka 15 kugirango tuzagire abakinny beza mu myaka iri imbere bavuye mu turere .”

De Gaulle kandi yongeyeho ko abakinnyi bazajya bakina aya marushanwa bazajya bahabwa buruse zo kwiga mu bigo by’ubumenyingiro.

Yagize ati:” aba bakinnyi bose abahungu n’abakobwa bazajya babona buruse za WDA y’umupira w’amaguru izafungurwa mu karere ka Huye vuba. Aba bakinnyi bazajya bajonjorwa buri mwaka bazafasha FERWAFA kugira amakipe akomeye kandi ahangana y’abatarengeje imyaka 17, 20 ndetse na 23 ndetse n’ikipe nkuru”

Umushinga w’irushanwa ry’abatarengeje imyaka 15 watangijwe na perezida wa FERWAFA De Gaulle wari witezweho gutanga umusaruro ariko wasaga n’uwibagiranye kuko uheruka utangira ntiwongere gukurikiranwa.

Uyu mushinga kandi uri mu byo umuyobozi wa SEC yanenze De Gaulle mu ibaruwa aherutse kumwandikira amusaba kwegura ku buyobozi bwa FERWAFA.

Yisangize Inshuti.

Ibitekerezo

Tanga Igitekerezo