Iby’ingenzi ukwiye kumenya ku mukino urahuza Real Madirid na Atletico

1

Umukino ubanza wa 1/2 cy’amakipe yabaye aya mbere iwayo ku mugabane w’i burayi, ugiye guhuza amakipe yo mu mujyi umwe (derby) aho Real Madrid yakira ku kibuga cyayo Santiago Bernabeu ikipe ya Atlético Madrid ku isaha ya saa mbiri na mirongo ine n’itanu z’umugoroba (20:45’) kuri uyu wa Kabiri.

Uyu ni umukino ugiye guhuza izi kipe zombi zigiye guhura ku nshuro ya 3 mu myaka ine yikurikiranya zihurira muri iri rushanwa rya UEFA champions league (UCL), aho kuri ubu ziri guhatanira itike igana ku mukino wa nyuma uzabera i Cardiff ho mu Bwongereza tariki ya 3 Kamena 2017.

Ikipe ya Real Madrid iri bwakire uyu mukino ikaba ari nayo ifite iki gikombe cy’umwaka ushize wa 2016 nabwo ku mukino wa nyuma yari yatsinze iyi kipe ya Atlético Madrid y’umutoza Diego Simeone kuri za penaliti 5-3, kandi iyi kipe ikaba ari nayo ifite ibikombe byinshi mu mateka y’iri rushanwa aho ifite ibisaga 11.

Mu myaka itatu ishize kandi aya makipe yahuriye ku mukino wa nyuma inshuro ebyiri zose ariko Real Madrid icyegukana aho muri 2014, Real Madrid yatsinze Atlético Madrid ibitego 4-1 hitabajwe iminota 30 y’inyongera, nyuma yuko Sergio Ramos yari yishyuye ku munota wa 93, naho muri 2016 Real Madrid yegukanye iki gikombe na none itsinze Atletico Madrid kuri penaliti 5-3 nyuma yaho ikipe zombi zari zanganyije igitego 1-1.

Umutoza Zinedine Yazid Zidane wa Real Madrid, yatangaje ko kuba umwaka ushize baratsinze iyi kipe ntacyo biri bube bivuze ku mukino w’uyu munsi, akaba yakomeje avuga ko azi neza ko iyi kipe buri uko bahuye ibaha akazi gakomeye yewe ngo intwaro yabo ya mbere ikaba ari uguhangana kugeza ifirimbi ya nyuma ivuze.

Ku rundi ruhande umutoza Diego Simeone avuga ko nta kidasanzwe gitandukanye n’ibyo yabaga yabwiye abakinnyi mbere y’imikino ibiri yahuje izi kipe zombi mu myaka itatu ishize ariko ngo ko kuri iyi nshuro yaremyemo abakinnyi icyizere cy’uko noneho babasha gusezerera iyi kipe baba mu mujyi umwe.

Muri uyu mwaka muri shampiyona ya Espagne mu mikino ibiri yahuje aya makipe Real Madrid yabashije gusaruramo amanota agera kuri 4, naho Atlético Madrid ibonamo inota 1 gusa.

Kuri uyu munsi Real Madrid iraza kuba yagaruye mu kibuga myugariro wayo Rafael Varane naho umukinnyi wayo Gareth Bale akaba utazaboneka mu mikino yombi yaba ubanza n’uwo kwishyura kubera ikibazo cy’imvune. Myugariro wayo Pepe we azaboneka ku mukino wo kwishyura ukongeraho na Coentrao nawe wavunitse.

Ikipe ya Atlético Madrid yo iraza kuba idafite ba myugariro bayo Juanfran,Gimenez na Sime ukongeraho n’abakinnyi 2 bo hagati aribo Carrasco na Augusto Fernandez.

Dore ibindi bigiye bitandukanye wamenya mbere y’uyu mukino utaza kuba woroshye:

*Mu mikino itandatu iheruka guhuza aya makipe yombi, ikipe ya Real Madrid yabashije gutsindamo imikino 2 inganya imikino 3 ibasha gutakaza umukino umwe gusa.

*Real Madrid iri gukina 1/2 ku nshuro ya 7 yikurikiranya, aya akaba ari amwe mu mateka bihariye muri iri rushanwa.

*Atlético Madrid yatsinzwe umukino umwe mu mikino 10 bakinnye uyu mwaka w’imikino muri Champions League, inganya indi ibiri.

*Kuva mu mwaka wa 2010-11,ikipe ya Real Madrid yatsinze imikino 35 mu mikino 41 ya Champions League bakiniye ku kibuga cyabo Santiago Bernabeu, aho batsinzwe imikino ibiri gusa irimo uwo batsinzwe na Fc Barcelona muri Mata 2011 (0-2) hamwe na Schalke muri Werurwe 2015 (3-4).

*Real Madrid na Juventus Fc ni yo makipe asigaye muri iri rushanwa ataratsindwa umukino n’umwe uyu mwaka wa UCL, Real Madrid kandi yatsinzwe rimwe mu mikino 12 yo gukuranamo iheruka, ubwo batsindwa na Wolfsburg 2-0 muri Mata 2016.

*Real Madrid igeze muri 1/2 nyuma yo gusezerera Napoli muri 1/8 ku giteranyo cy’ibitego (6-2) na Bayern Munich muri 1/4 ku giteranyo cy’ibitego (6-3).

*Atlético Madrid yo ikaba igeze muri 1/2 nyuma yo gusezerera Bayern Leverkusen muri 1/8 ku giteranyo cy’ibitego (4-2) na Leicester City muri 1/4 ku giteranyo cy’ibitego (2-1).

Abakinnyi bashobora kubanzamo ku mpande zombi:

Real Madrid: Navas; Carvajal, Ramos, Varane, Marcelo; Kroos, Casemiro, Modrić; Isco, Benzema, Ronaldo.

Atlético Madrid: Oblak; Hernández, Godín, Savić, Filipe Luís; Ñíguez, Koke, Gabi, Carrasco; Griezmann, Gameiro.

Umukino wa 1/2 wo kwishyura uteganyijwe mu cyumweru gitaha tariki ya 10 Gicurasi 2017 ku kibuga cy’ikipe ya Atlético Madrid Vicente Calderón Stadium.

David K. Mugaragu

Yisangize Inshuti.

Ibitekerezo 1

Tanga Igitekerezo