Guardiola ngo nta mukinnyi mwiza wo hagati arabona nka Carrick wa Man United

Carrick uza gukina umukino ubahuza na Man City

Umutoza wa Manchester City, Pep Guardiola yavuze ko kuva yabaho nta mukinnyi wo hagati ugikina arabona ushoboye nka Michael Carrick wa Manchester United.

Ibi Guardiola abivuze mu gihe hasigaye amasaha make Man City na Man United zigacakirana mu mukino uraba saa tatu z’umugoroba kuri uyu wa Kane ku kibuga cya Man City.

Carrick w’imyaka 35, amaze gukinira Manchester United imikino 450 kuva yagurwa muri Tottenham Hotspur mu mwaka wa 2006.

Aganira n’abanyamakuru Guardiola yagize ati "Kuva nabaho, ni we mukinnyi mwiza wo hagati maze kubona.Ndamufana cyane, ari ku rwego rwa ba Xabi Alonso na Sergio Busquets."

Guardiola kandi yavuze ko uretse Carrick, anakunda imikinire ya Marcus Rashford, avuga ko uwo musore ari impano izabyarira umusaruro ikipe y’igihugu y’Ubwongereza.

Hari abashimye amagambo ya Guardiola, ariko abandi bavuga ko ashobora kuba ari amayeri yo kujijisha umutoza Mourinho n’abakinnyi be ngo abice mu mutwe.

Manchester City ni iya Kane n’amanota 64 ku rutonde rwa shampiyona, ikurikiwe na Man United ifite amanota 63.Man city nitsindwa uyu mukino irahita iva muri ane ya mbere, naho Man iwutsinze yahita yinjira muri ane ya mbere.

Yisangize Inshuti.

Ibitekerezo

Tanga Igitekerezo