Federasiyo ya Karate irifuza gushyiraho umunsi izajya yibukiraho Me Sayinzoga Jean

1

Federasiyo ya Karate mu Rwanda (FERWAKA) yatangaje ko igiye kwicara ikazashaka umunsi izashyiraho wo kujya yibuka Me Sayinzoga Jean witabye Imana kuri uyu iki Cyumweru.

Me Sayinzoga wari Umuyobozi wa Komisiyo ishinzwe gusubiza mu buzima busanzwe ingabo zavuye ku rugerero, yitabye Imana mu bitaro byitiriwe Umwami Faycal, aho bivugwa ko yazize kanseri y’umwijima.

Sayinzoga yari umuntu ukomeye mu mikino ya Karate, haba mu Rwanda no mu Karere.

Ferwaka yatangaje ko yabuze umuntu w’ingenzi wayigiraga inama knadi wari ufite icyo avuze kuri Mukino wa Karate mu Karere k’Ibiyaga bigari.

Barnabé KARAMAGA, Visi Perezida wa Federasiyo y’Umukino wa Karate mu Rwanda, yatangarije Makuruki ko kubera ibikorwa bya Sayinzoga, bazashaka umunsi wo kujya bamwibuka buri mwaka.

Karamaga yavuze ko yamenyanye na Sayinzoga kera bakiba I Bujumbura, ari na we wamwigishaga.

Ngo gutangiza Karate mu Burundi byagoye Sayinzoga kuko ngo hari abayobozi babifataga nk’umukino w’amabandi.

Yagize ati “Karate wari umukino ufatwa nk’uw’amabandi.Kubyumvisha abayobozi I Burundi byaramuvunnye, yagombye kwifashisha bamwe mu bayobozi bari barabaye Iburayi.”

Ikipe ya mbere ya Karate Sayinzoga yatangije i Burundi yitwaga Puma nkuko Karamaga yakomeje abivuga.

Amaze kugera mu Rwanda, ngo Sayinzoga baramwinginze ngo ayobore Federasiyo arabyanga, avuga ko ibyo bikwiye gukorwa n’abakiri bato, ahubwo byaba ngombwa akajya abagira inama.

Karamaga avuga ko babuze umuntu w’ingenzi, kubw’ibyo bakaba bagomba gushaka umunsi bazajya bamwibukiraho nk’umuntu wagize uruhare rukomeye mu iterambere rya Karate mu Karere.

Yagize ati “Tuzicara turebe umunsi tuzajya tumwibukiraho, duhe agaciro ibikorwa bye.Kumutabara tuzamutabara ariko tugomba gushaka uwo munsi.”

Sayinzoga Jean yitabye Imana yari afite dani ya gatandatu muri Karate.

Yisangize Inshuti.

Ibitekerezo 1

Tanga Igitekerezo