Ese Rayon Sports ntiyaba yatewe nayo ikitera?

3

Umutoza wa Rayon Sports yaraye ahagaritswe , ubuyobozi buvuga ko yahagaritswe kuko atumvikanaga n’abatoza bamwungirije, ibi bibaye nyuma yo gusezererwa n’ikipe ya Rivers United muri Confederation cup.

Umunyamabanga w’iyi kipe Gakwaya Olivier yavuze ko uyu mutoza atumvaga inama za bagenzi be bafatanyaga gutoza barimo Nshimiyimana Maurice Maso ari na we umwungirije ndetse na Lomami Marcel umutoza ushinzwe kongerera ingufu abakinnyi.

Umutoza Masudi yageze muri Rayon Sports muri 2015, mu kwezi kwa 12 atangira yungirije Ivan Minaert. Mu kwezi kwa kabiri mu mwaka wa 2016 Masudi yahawe ikipe ngo ayitoze nyuma y’uko Ivan Minaert yari amaze gusezera. asezeye.

Masudi yatangire urugendo rwo kugarura ibyishimo mu bakunzi ba Rayon Sports agarura umukino kamere w’iyi kipe wo gusatira , atangira gukoresha ba rutahizamu babiri Kasirye na Diala.

Ibi byatumye Rayon Sports itangira gutsinda kandi ibitego byinshi idasize n’abakeba ihereye kuri Police FC yatsinze ibitego 3-1 muri shampiyona, ikurikizaho APR FC yatsinze ibitego 4 ku busa muri shampiyona.

Rayon Sports kandi yahise itwara igikombe cy’Amahoro itsinze mukeba wayo APR FC. Iki gikombe yagitwaye yari imaze imyaka 11 itagica iryera.


Masudi yahaye Rayon Sports igikombe cy’Amahoro nyuma y’imyaka 11 itagitwara

Ibi byose Masudi yabikoze atoza wenyine atagira umwungiriza ariko nyuma Lomami Marcel aza kuzanwa ngo amufashe. Agitangira umwaka ukurikiyeho Masudi yahawe Nshimiyimana Maurice Maso ngo amwungirize hanyuma Lomami Marcel abe umutoza ushinzwe kongerera ingufu abakinnyi.

Aba batoza bose nta n’umwe Masudi yagize uruhare mu kuzana, yarabazaniwe ndetse amakuru icyo gihe yavugaga ko Masudi yifuzaga ko yizanira umwungiiriza akuye i Burundi.

Muri uyu mwaka Masudi yakoze amateka yo kumara imikino 7 atarinjizwa igitego na kimwe muri shampiyona kuko igitego cya mbere yakinjijwe na Gicumbi FC ku munsi wa 8 wa shampiyona nyamara Rayon Sports yari izwiho gutsindwa ibitego cyane.

Masudi kandi yakoze amateka yo kurusha umukeba APR FC amanota 11 ibintu byari bibaye bwa mbere kuva aya makipe yatangira guhangana mu mwaka wa 1995.

Byatunguranye ku mugoroba wo kuri uyu wa Mbere ubwo amakuru yasakaraga, avuga ko Masudi yahagaritswe imikino ibiri adatoza ndetse bikanemezwa n’ubuyobozi ko yazize gusuzugura bagenzi be bakorana.

Amakuru agera kuri Makuruki ariko avuga ko mu gutegura umukino wa Rivers United, umutoza Masudi aribwo ashinjwa ko atumvise bagenzi be bamusaba gukina sisiteme isanzwe ituma Savio Nshuti akina imbere ku mwanya we naho Eric Irambona agakina inyuma ku ruhande rw’ibumoso.

Ibi Masudi ntiyabikoze ahubwo yongeye kwikinishiriza sisiteme ye yo gukinisha Savio na Nova Bayama ku mpande bonyine bakina imbere ariko banagaruka inyuma.

Ese koko Masudi yazize gusugugura abatoza bakorana cyangwa yasuzuguye abayobozi?

Amakuru agera kuri Makuruki avuga ko Masudi yaba yaratumiwe mu nama zo gutegura umukino wa Rivers hamwe n’ubuyobozi ariko akabyanga bikarakaza abayobozi cyane.

Ubwo umukino wahuzaga Rugende na Rayon Sports mu gikombe cy’Amahoro warangiraga, Masudi na we yabiciyemo amarenga ubwo yabwiraga itangazamakuru ko we n’abakinnyi badakeneye amagambo menshi y’abayobozi ahubwo ko bakeneye umwanya wo gutuza bagategura umukino batuje.

Ku munsi nyirizina w’umukino ubwo igice cya mbere cyarangiraga Perezida wa Rayon Sports Gacinya Denis n’umwungiriza Rutagambwa Martin basaze ikipe mu rwambariro. Bivugwa ko basabye Masudi kwinjiza mu kibuga Manishimwe Djabel ariko we arabyanga ahubwo ashyiramo Sefu na Eric.



Perezida wa Rayon Sports Gacinya aha yirukaga ajya mu rwambarira ubwo igice cya mbere cyarangiraga

Nyuma kandi yagiye kwinjiza mu kibuga Lomami Frank ariko abakinnyi bamugira inama yo gushyiramo Djabel.

Masudi nk’umutoza mukuru yakumvira abamwungirije cyangwa ntabumvira ni we ugomba kubazwa umusaruro w’ikipe. Nubwo rero ashinjwa kutabumvira, umusaruro we si mubi kuko ubu ayoboye andi makipe ndetse yaranayanikiye kuko arusha APR FC amanota 5 kandi afite imikino ibiri y’ibirarane.

Umwe mu bakinnyi bakuru muri Rayon Sports baganiriye na Makuruki yavuze ko uyu mutoza koko yiyemera kandi atagirwa inama ngo kuko ibyemezo byose ariwe ubifata kubwe ngo abona akwiye no kwirengera ingaruka zavamo.

Ese cyari igihe cyo guhagarika uyu mutoza

Iyi kipe ifite abakunzi benshi mu Rwanda ikunze gushinjwa guterwa nayo ikitera, gutsindwa umukino wa Rivers United byaciye intege cyane iyi kipe ndetse n’abakunzi bayo.

Cyari igihe cyo kwicara bakisuganya bagasibanganya iki cyuho cyatewe no gutsindwa uriya mukino. Gusa siko bigenze ahubwo ibibazo byo gutsindwa bihise byiyongeramo ibyo bikururiye ubwabo, bahagarika umutoza wari waramaze kwigarurira abafana.

Nta wabura kuvuga kandi ko hari impungenge ko Rayon Sports ishobora kuzongwa n’ibi bibazo bigatuma itakaza igikombe cya shampiyona yari yaramaze kwizeza abakunzi bayo.

Masudi nagaruka azabana ate na bagenzi be ashinjwa ko atabumva

Uyu mutoza biteganyijwe ko agomba gutangira imyitoza kuwa mbere w’icyumweru gitaha kuko aribwo ibihano bye bigomba kurangira.

Gusa ikibazo buri wese yakwibaza ni uburyo umutoza Masudi azagaruka akabana n’abatoza bamwungirije kandi bivugwa ko aribo yazize ngo kuko atumvikanaga nabo.

Iki nacyo ni ikindi kibazo umuntu yakwitega mu minsi iri imbere kuko nibaramuka batumvikanye , hari uruhande rumwe rushobora gusohoka muri Rayon Sports kuko ntibakorana batumvikana.

Umutoza Maso usigaranye ikipe kandi arasabwa gucunga neza umwuka uri hagati y’abakinnyi kuko akenshi iyo ibibazo nk’ibi bibaye hatabura abakinnyi bivumbura bagashyigikira umutoza wagiye, ibi kenshi bituma ikipe icikamo ibice bibiri .

Umutoza Masudi na we biravugwa ko mu masaha make ashobora gutangaza icyo atekereza kuri iri hagarikwa rye.

Wowe urabyumva gute?


Masudi na Pierrot bari babaye nyuma yo gusezererwa na Rivers United


Masudi ngo ntiyumvaga inama z’abatoza bamwungirije

Yisangize Inshuti.

Ibitekerezo 3

  1. Si ndi umukunzi wa Rayon ariko muri rusange nkunda umupira wacu ariko mbona kuriya ari uguhubuka gusanzwe ku ba Rayon,iki sicyo cyari igihe mu mpera za championat ku kipe ihagaze neza kuriya?yashoboraga no gutwara coupe de la paix?ntitwamenya ikibiri inyuma ariko icyo maze kubona burya hari abantu baba muri Rayon batajya bifuza ko igira ibyishimo birambye.Inatwaye iki gikombe rwose ntikizitirirwe undi kandi izanagitwara ku musingi Masudi yari amaze kubaka.Imana imuhe kwihanganira ibimubayeho amenye ko nta Rayon ibaho itari mu bibazo.Naho ikipe yayisezereye tujye twemera burya tutabeshye irakomeye.

  2. Ibyo muri rayon wagirango nurugo rutagira umugabo, bashaka kutwicira ibyishimo iyo bamureka akabanza akarangiza season niba abasuzugura agatsinda ikibazo nikihe? nibyiza kwigirira confidence. nizereko bamureka akagaruka vuba kuko twari muri good position yogutwara igikombe. thx

Tanga Igitekerezo