EURO2016: Imikino ya 1/4 irakomeza Portugal ihura n’imwe mu makipe ayigora

2

Kuri uwa kane tariki ya 30 Kamena 2016, ni bwo hari butangire imikino ya 1/4 cy’igikombe cy’Uburayi 2016 (EURO 2016) kiri kubera mu gihugu cy’Ubufaransa, aho Portugal igeze muri iki kiciro idatsinze umukino n’umwe, iri bube ikina na Poland ihageze idatakaje umukino n’umwe.

Iki cyiciro cyagezwemo n’amakipe 8 ariyo, Portugal, Poland, Ubutaliyani, Ubudage, Wales, Ububiligi, Iceland n’Ubufaransa.

Ikipe ya Portugal igeze muri 1/4 nta mukino n’umwe itsinze mu minota 90 isanzwe y’umukino, dore ko n’uwo yatsinze yawutsinze mu minota 30 y’inyongera nyuma y’uko iminota 90 y’umukino yari yarangiye na Croatia ubwo bari muri 1/8 kirangiza cy’iri rushanwa.

Imikino yose yo mu matsinda ikipe ya Portugal ntiyigeze ibasha gutsinda n’umwe kuko mu mikino yose itatu yayinganyije, hari uwo yanganyije na Iceland 1-1, umukino ukurikiyeho inganya na Austria 0-0 naho umukino usoza amatsinda yawunganyijemo na Hungary 3-3.

Ikipe ya Poland yo igeze muri 1/4 idatsinzwe umukino n’umwe kuko mu mikino ya matsinda yatsinzemo imikino ibiri ndetse inganyamo umukino umwe. Mu mikino y’amatsinda iyi kipe yakinnye, harimo uwo yatsinzemo Northern Ireland igitego 1-0, umukino ukurikiyeho inganya n’Ubudage 0-0 naho umukino usoza amatsinda itsinda Ukraine igitego 1-0.

Muri 1/8 iyi kipe yaje gusezerera Ubusuwisi kuri penaliti 5-4 nyuma yaho amakipe yombi yari yanganyije igitego 1-1.

Uyu munsi amateka yerekana ko uyu mukino uza kuba ukomeye bitewe n’uko mu gihe cyose aya makipe yagiye ahura byagiye bigaragara ko asa nari ku rwego rumwe n’ubwo Portugal ari yo iza imbere mu gutsinda imikino myinshi.

Mu mikino 10 aya makipe aheruka guhura, Portugal yatsinzemo imikino 4 banganya 3 Poland itsinda 3.

Mu mikino ibiri iheruka guhuza aya makipe, aya makipe yombi yarayinganyije. Muri iyo mikino harimo uwo amakipe yombi yanganyijemo ibitego 2-2 mu mukino wo gushaka itike y’igikombe cy’Uburayi cya 2008 ndetse n’uwo bakinnye mu 2012 mu mukino wa gishuti, aho banganyijwe 0-0.

Dore indi mikino iteganyijwe muri 1/4 cya Euro 2016

Tariki ya 1 Nyakanga 2016: Wales vs Belgium(21:00’)
Tariki ya 2 Nyakanga 2016: Germany vs Italy(21:00’)
Tariki ya 3 Nyakanga 2016: France vs Iceland(21:00’)

Canisius KAGABO

MAKURUKI.RW

Yisangize Inshuti.

Ibitekerezo 2

Tanga Igitekerezo