De Gaulle yagaragaje ibyo azakorera Amavubi aherutse gukorera amateka mu Misiri

Umuyobozi w’ishyirahamwe ry’umupira w’amaguru mu Rwanda FERWAFA, Nzamwita Vincent De Gaulle yemeza ko ikipe y’igihugu y’abakiri bato (U 20) igiye gushakirwa imikino myinshi kugira ngo ikomeze kuzamura imikinire yayo no gufasha abakinnyi gukomeza kugira ubunararibonye.

Iyi kipe iherutse gukorera amateka mu Misiri iba ikipe ya mbere y’igihugu ihagarariye u Rwanda mu mupira w’amaguru itsindira Misiri iwayo n’ubwo yaje kuvanwamo kuri penaliti.

Icyo gihe iyi kipe y’u Rwanda y’abatarengeje imyaka 20 yatsinze igitego 1 ku busa ariko iza gukurwamo kuri penaliti 3-2.

Nyuma iyi kipe yakinnye umukino na Maroc hano I Kigali, umukino wari mu rwego rwo kwibuka abazize Jenoside yakorewe abatutsi mu 1994, aho amakipe yombi yanganyije igitego 1-1.

Ubushobozi iyi kipe yagaragaje bwatumye abantu bakurikiranira hafi umupira w’amaguru bifuza ko yakurikiranwa igahabwa imikino myinshi igakomeza kumenyerana.

Umuyobozi wa FERWAFA, Nzamwita Vincent De Gaulle na we yemeje ko ibi bizakorwa kandi ko n’abatoza bagomba gukomeza akazi n’ubwo Kayiranga umutoza mukuru w’iyi kipe nta masezerano yari afitanye na FERWAFA cyangwa na MINISPOC yo gutoza iyi kipe.

Agiea ati: "Gahunda dufitiye rero aba bana, gahunda ni iyihe? Gahunda ni uko bafite imikino myinshi mbere y’aha, nari nabivuze abatoza bakomeze bakore akazi kabo basezerewe kigabo ejo ejobundi aba ngaba baba U 23 ikipe ya Olympic. Harimo kubashakira imikino myinshi muri za COSAFA (amarushwana ahuza ibihugu byo muri Afurika y’amajyepfo) ya U 20 izaba mu kwezi kwa 12, bakagenda bakina imikino myinshi bakagenda bakura, bakura.”

Uyu muyobozi ariko yavuze ko iyi kipe idafunze kuko umwana wese uzitwara neza yemerewe kuyijyamo.

Yisangize Inshuti.

Ibitekerezo

Tanga Igitekerezo