Casa Mbungo mu nzira zo kongera amasezerano muri Sunrise

Umutoza Casa Mbungo Andre wasoje amasezerano yari afitanye n’ikipe ya Sunrise ubu ibiganiro bigeze kure n’iyi kipe ku buryo nta gihundutse azashyira umukono ku masezerano yo gukomezanya n’iyi kipe bitarenze iki cyumweru.

Nyuma y’uko ikipe ya Sunrise yirukanye Chibe Ibe Andrew, umunya-Nigeria wari umutoza mukuru wayo bitewe n’uko yakoreshaga ibyangombwa mpimbano, mu kwezi kwa Gashyantare iyi kipe yitabaje Casa Mbungo bumvikana ko abafasha kugeza shampiyona irangiye.

N’ubwo amasezerano ye yarangiye, uyu mugabo ntarava Iburasirazuba cyangwa ngo twumve indi kipe yamaze gusinyira n’ubwo byagiye bivugwa ko ari mu biganiro n’ikipe ya Mukura ndetse n’andi makipe atandukanye.

Amakuru yizewe agera ku kinyamakuru Makuruki ni uko uyu mugabo yamaze kwemeranya n’ikipe ya Sunrise gukomezanya na yo mu mwaka w’imikino utaha wa 2017/2018.

Amakuru avuga ko impande zombi zamaze kumvikana ku bijyanye n’amasezerano, Sunrise yamaze kwereka uyu mugabo ibyo imukeneyeho ndetse na we abereka ibyo basabwa maze barumvikana kuri buri kimwe cyerekeranye n’ibimureba.

Uyu mutoza ndetse bivugwa ko yamaze kwereka ubuyobozi bw’iyi kipe abakinnyi yifuza kuba yokomezanya na bo mu mwaka utaha w’imikino ndetse binavugwa ko yamaze no kuba yakora urutonde rw’abakinnyi b’iyi kipe bagomba kuyisohokamo.

Casa Mbungo Andre ubundi yakabaye yaramaze gushyira umukono ku masezerano kuwa Kabiri tariki ya 20 Kamena 2017 ariko ntibyaje gukunda ariko amakuru yizewe aturuka muri iyi kipe ni uko iki cyumweru kirangira yamaze gusinyira iyi kipe.

Iyi kipe itarahiriwe n’uyu mwaka w’imikino ivuga ko yamaze kuvugurura uburyo bw’imikorere yayo ndetse n’Akarere kemeye kongera amafaranga batangaga kuri iyi kipe ndetse akaba ari na yo mpamvu Casa yaba yaremeye gukomezanya n’iyi kipe.

Ubuyobozi bw’iyi kipe buvuga ko bwagowe no kwakira iyi kipe Akarere karamaze gutegura ingengo y’imari ariko ubu kakaba noneho mu ngengo y’imari y’uyu mwaka na Sunrise na yo barayitekerejeho.

Canisius KAGABO / MAKURUKI.RW

Yisangize Inshuti.

Ibitekerezo

Tanga Igitekerezo