Uzamukunda Elias yiyongereye ku bakinnyi batazakinira Amavubi ku mukino wa Mozambique

2

Rutahizamu w’ikipe ya Le Mans mu gihugu cy’u Bufaransa ndetse n’ikipe y’igihugu Amavubi, Uzamukunda Elias ‘Baby’ ntakitabiriye ubutumire bw’ikipe y’igihugu Amavubi kubera ikibazo cy’imvune yagize.

Baby yari yitabajwe kugira ngo azafashe Amavubi ku mukino uzahuza u Rwanda na Mozambique mu mikino yo gushaka itike y’igikombe cya Afurika kizabera muri Gabon umwaka utaha.

Uyu mukino w’u Rwanda na Mozambique uteganyijwe kuri uyu wa gatandatu tariki ya 4 Gicurasi 2016. Uyu ni umukino w’umunsi wa 5 mu itsinda H mu gushaka tike y’igikombe cya Afurika, aho u Rwanda ruri ku mwanya wa kabiri inyuma ya Ghana.

Nk’uko tubikesha urubuga rw’umupira w’amaguru hano mu Rwanda (FERWAFA), ngo uyu mukinnyi akaba yaragize ikibazo cy’imvune ku wa gatanu w’icyumweru gishize ubwo yari mu myitozo ya nyuma n’ikipe ye bitegura umukino wa shampiyona bagombaga guhuramo na Chateauroux ku wa gatandatu w’iki cyumweru dusoje tariki ya 28 Gicurasi 2016 umukino atanakinnye kubera iyi mvune.

Gusa aya makuru y’iyi mvune ya Baby hari bamwe bayibazaho bavuga ko byaba ari urwitwazo rwo kwanga kuza gukinira ikipe y’igihugu bitewe n’uko Baby ubwe aganira na Radio10 ku wa gatandatu atigeze avuga ko afite ikibazo cy’imvune ahubwo ko yiteguye kuza mu Rwanda kuko itike ye ngo yari ku tariki ya 29 Gicurasi 2016.

Uzamukunda abaye umukinnyi wa kabiri mu bari bahamagawe bakina ku mugabane w’u Burayi utakije gukinira Amavubi nyuma ya Nirisarike Salomon na we wavuze ko atazaza kubera ibibazo by’urupapuro rw’inzira.

Yisangize Inshuti.

Ibitekerezo 2

  1. Nanjye arinjye sinaza. Ubwo wahamagara umukinyi wiburayi koko aje gukora imyitozo gusa utari bumukinishe akazagaruka koko? Harimo no gusesagura amafaranga niba bataragera ku rwego kuburyo bajya mu kibuga nta mpamvu yo kubategera ngo baze mu rwanda

Tanga Igitekerezo