Amafoto agaragaza imvune 10 zikomeye zabayeho mu mateka y’umupira w’amaguru.

2

Kuva umupira w’amaguru watangira gukinwa wagiye ugaragaramo zimwe mu mvune zikomeye zagiye zikura umutima amakunzi bawo.

Twabegeranyirije imvune 10 zikomeye kurusha izindi zaranze umupira w’amaguru kuva watangira gukinwa.

1. David Busst

Iyi mvune yabaye tariki ya 8 Mata 1996, ubwo ikipe ya Conventry City yasuraga ikipe ya Manchester United . Mu minota ibiri uyu mukinnyi wakinaga inyuma David Busst yagiye gufasha bagenzi be gutsinda koruneri bari babonye.

Uyu musore ariko ntibyamuhiriye kuko yahise aterwa takere(takle) yatewe n’abakinnyi babiri ba Manchester united , Brian McClair na Denis Irwin bimuviramo imvune ikomeye igufwa ry’ukuguru ricikamo kabiri. Iyi niyo imvune ikomeye kurusha izindi imaze kuboneka mu mateka ya Ruhago ku Isi.

Iyi mvune yatumye Busst abagwa inshuro 26 ariko n’ubundi gukira biranga ahubwo bimuviramo ubumuga. Nyuma y’amezi arindwi avunitse yahise atangaza ko ahagaritse kongera gukina umupira burundu ku myaka 29 gusa bivuye ku nama yagiriwe n’umuganga.

2. Alf-Inge Haaland

Iyi ni imvune yabaye ubwo hari habaye umukino w’ishiraniro mu mujyi wa Manchester City na mukeba wayo Manchester United. Muri uyu mukino uwahoze ari kapitene wa Manchester United Roy Keane yakiniye nabi umukinnyi Alf-Inge Haaland wo mu ikipe ya Manchester City.

Ibi byatumye Keane ahanwa n’ishyirahamwe ry’umupira w’amaguru mu Bwongereza FA. Icyo gihe yahagaritswe imikino umunani ndetse anacibwa amande angana na 150000 y’amapawundi.

Kuva ubwo Haaland ntiyongeye gukina umukino wose ndetse nyuma y’imyaka ibiri yahise ahagarika umupira w’amaguru. Yawuhagaritse mu kwezi kwa 7 mu mwaka wa 2003.

3. Alan Smith

Iyi mvune yabaye mu mwaka wa 2006 ubwo ikipe ya Manchester United yakinaga na Liverpool mu gikombe cya FA(FA Cup). Iyi mvune ya Alan Smith uwari umutoza we Sir Alex Ferguson yavuze ko ari ikintu gikomeye atarabona mu buzima bwe avuga ko ababaye bikomeye.

Smith ari mu bakinnyi bagize imvune zikomeye ariko bagakira vuba kuko nyuma y’amezi 7 yahise agaruka mu kibuga ndetse akanatsinda igitego ubwo Manchester United yatsindaga As Roma ibitego 7-1.

Smith yavunitse ubwo yari agiye kugarura umupira wari utewe na John Arne Riise kuri kufura. (coup franc)

4. Eduardo da Silva

Eduardo da Silva yahoze ari rutahizamu wa Dinamo Zagreb nyuma aza kuyivamo yerekeza muri Arsenal mu Bwongereza.

Yavunitse ubwo Arsenal yakinaga na Birmingham City mu kwezi kwa kabiri mu mwaka wa 2008 ubwo yaterwaga umuserebeko na myugariro Martin Taylor. Byatumye Eduardo avunika ukuguru kw’ibumoso.

Iyi mvune yababaje abantu benshi bari bari kurebera uyu mukino kuri Sky Sports byahise binategekwa ko amashusho y’iyi mvune atakongera kwerekanwa. Uyu musore yahise ajyanwa kwa muganga igitaraganya n’ubuyobozi bwa Arsenal , ndetse uyu mukino waje no kurangira amakipe yombi anganya ibitego 2-2.

Eduardo yagarutse mu kibuga nyuma y’umwaka ahita yerekeza mu ikipe ya Shakhtar Donetsk yo muri Ukraine muri Nyakanga mu mwaka wa 2010.

5. Aaron Ramsey

Uyu mukinnyi Aaron Ramsey ubwo yagurwaga n’umutoza Arsene Wenger yamukurikije amagambo meza amutaka ko ari umukinnyi w’umuhanga yaguze amukuye muri Cardiff mu mwaka wa 2008 ku myaka 17.

Uyu musore kandi yaje no kwerekana impano ye mbere y’uko avunika amaguru yombi.

Ramsey mu mwaka wa 2010 ubwo bakinaga n’ikipe ya Stoke City yaje kuvunika ubwo yaje kuvunika ubwo yakinirwaga nabi n’umukinnyi Ryan Shawcross, Ramsey yaje kuvunika amagufwa yo ku maguru yombi.

Nyuma y’uyu mukino umutoza Arsene Wenger yatangaje ko ari igikorwa cy’ubunyamaswa cyakozwe na Shawcross ndetse anasaba ko FA yamuhagarika burundu mu mupira w’amaguru w’Ubwongereza. Ramsey ubwo yavuze ko atazigera ababarira Shawcross.

6. Djibril Cisse

Uyu mukinnyi yavunitse inshuro ebyiri, ubwa mbere yavunitse ubwo ikipe ye ya Liverpool yakinaga na Blackburn Rovers mu kwezi kwa 10 mu mwaka wa 2004.

Cisse yavunitse ubwo yahuraga na mugenzi we Jay McEveley ahita avunika ukuguru kw’iburyo , uyu rutahizamu yaje gusubira mu kibuga nyuma y’umwaka bakina n’ikipe ya Juventus mu mikino ya Champions League muri Mata 2005.

Cisse kandi yaje kongera kuvunika mu mukino ikipe ye y’ u Bufaransa yakinaga umukino wa gishuti n’Ubushinwa .

Cisse yavunitse ubwo yakinirwaga nabi na kapitene w’ubushinwa ZHENG Zhi , iyi mvune yatumye Cisse adakinira ikipe y’u Bufaransa mu gikombe cy’Isi cyabereye mu Budage mu mwaka wa 2006.

ku myaka 31 uyu musore nibwo yagarutse mu kibuga akinira amakipe nka Marseille, Sunderland, Panathinaikos, Lazio na Queens Park Rangers nyuma aza kujya muri Quatar atijwe.

7. Luc Nilis

Nilis yari umwe mu bakinnyi bakomeye muri shampiyona y’Ubuhorandi mu ikipe ya PSV. Uyu Mubiligi yakinanaga neza na rutahizamu Ruud Van Nistelrooy . Gusa Nilis yaje guhagarika gukina nyuma y’uko avunikiye mu mukino wahuje Aston Villa yari yaramuguze ihura na Ipswich Town mu mwaka wa 2000.

8. Bobby Zamora

Rutahizamu Bobby Zamora yasinyiye ikipe ya Fulham avuye mu ikipe ya West Ham United mu mwaka wa 2008. Uyu mukinnyi yavunitse mu mwaka wa 2010 ubwo bakinaga na Wolverhampton Wanderers ubwo yari akimara gusinya andi masezerano.

Kapitene w’ikipe ya Wolves , Karl Henry niwe wabaye intandaro y’ivunika rya Zamora nyuma yo guhurira mu mukino akaza kumutera umuserebeko , Zamora ahita avunika.

Zamora yagarutse mu kibuga nyuma y’amezi atanu ahita ajya gukinira ikipe ya Queens Park Rangers.

9. Neil Taylor

Neil Taylor ni umukinnyi uva muri Pays de Galles ukina inyuma ku ruhande rw’ibumoso, yavunikiye mu mukino ikipe ya Swansea City na Sunderland mu kwezi kwa mu mwaka ushize wa 2014 nyuma yo guhura n’umukinnyi ukina hagati Craig Gardner.

Taylor nta wundi mukino yongeye gukina muri iyo shampiyona ariko abaganga bakemeza ko iyi shampiyo izatangira yamaze kugaruka.

10. Marcin Wasilewski

Myugariro wa Anderlecht, Wasilewski yavunitse ukuguru kw’iburyo ubwo yakinaga shampiyona y’Ububiligi mu mukino wabahuzaga na Standard Liege mu kwezi kwa 2009.

Umukinnyi wakinaga hagati muri Standard de Liege, Alex Witsel yakandagiye uyu mugenzi mu minota 25 ya nyuma y’umukino bituma avunika igufwa ry’ukuguru.

Witsel yahise ahagarikwa imikino 8 , mu gihe Wasilewski we yagarutse mu kibuga mu mukino wahuje ikipe ye na Zulte Waregem bakanayitsinda ibitego 2-1 akanatsindamo igitego.

Yisangize Inshuti.

Ibitekerezo 2

Tanga Igitekerezo