Abikangaga isenyuka ry’ikipe ya INATEK barahumurizwa

Umuyobozi w’ishyirahamwe ry’umukino w’intoki wa Volley Ball mu Rwanda Nkurunziza Gusatve yemeza ko ikipe ya INATEK VC ari ikipe nziza ifatiye runini uyu mukino kandi ko bazayifasha ngo ikomeze kubaho, iyi kipe byavuzwe ko ishobora gusenyuka nyuma y’uko Prof. Silas Lwakabamba agiye kuyobora iyi kaminuza.

Umwaka ushize ni bwo INATEK VC yatwaye igikombe cya shampiyona mu mateka yayo, iki gikombe yagitwaye iri ku rwego rukomeye kuko yari igitwaye amakipe nka Rayon Sports VC na APR VC.

INATEK VC yahise inabona umwanya wo kuzahagararira u Rwanda mu mikino ya Afurika y’amakipe yabaye aya mbere iwayo Champions League ariko nyuma gato uwari umuyobozi wayo wanayifashaga gutera imbere yaje kwitaba Imana asimburwa na Prof Lwakabamba Silas, maze ibihuha bitangira guhwihwiswa ko iyi kipe izahita isenyuka nk’uko no mu cyahoze ari UNR byagenze ubwo Prof Lwakabamba yahageraga agahita asenya ikipe ya Volley Ball yari ikomeye igatangira gusubira inyuma.

Nyuma y’uko Lwakabamba aza muri INATEK VC yahise inanirwa guhagararira u Rwanda mu mikino ya champions league ku mpamvu y’uko ubuyobozi bw’ikigo bwavuze ko nta mafaranga bufite yo kongera ku nkunga MINISPOC yari yabahaye, ibintu byahise bica amarenga ko iyi kipe igiye gusenyuka nkuko byari byavuzwe mbere.


Prof Lwakabamba afite igikombe cya GMT ikipe ye yari imaze gutwara.

Bamwe mu bakinnyi bayo na bo bagiye bagaragaza ko ikipe yabo ishobora kuba iri gukina mu minsi ya nyuma ubundi igasenyuka n’ubwo ntawemeraga kubivuga ku mugaragaro.

Umuyobozi w’ishyirahamwe ry’umukino wa Volleyball mu Rwanda FRVB, Gustave Nkurunziza, we yemeza ko ibi bibazo babiganiriye n’ubuyobozi bw’iyi kaminuza ngo budasenya iyi kipe kandi ngo bakaba bizera ko itazasenyuka.

Ati:”Ni ikipe ikomeye, ni ikipe nziza, ni ikipe kandi ihozaho, bivuze ko imaze gufata umurongo w’intambwe udahindagurika, tukaba twizera ko izakomeza gutyo ni ba hari ibyo tugomba kuyifasha hari ibyo bagendaga batubwira bigendanye n’imiyoborere no kubaho kwayo muri rusange ibyo byose twagerageje kubiganira n’abayobozi bayo turizera ko ari ikipe izakomeza igatanga umurongo ngenderwaho muri Volley Ball.”

INATEK VC yaraye itwaye igikombe cy’irushanwa ryo kwibuka abahoze ari aba sportif bazize Jenoside yakorewe abatutsi itsinze Sport S yo muri Uganda amaseti 3 ku busa.

Yisangize Inshuti.

Ibitekerezo

Tanga Igitekerezo