Abashinzwe guhitamo umutoza w’amavubi bagizwe ibanga, bazatangazwa barangije akazi

1

Mu gihe bamwe mu bakunzi b’Ikipe y’Igihugu y’umupira w’amaguru Amavubi bibazaga ubushobozi bw’abagize akanama nkemurampaka gashinzwe gukoresha ibizamini no gutoronya uzaba Umutoza w’Amavubi, Umuvugizi w’Ishyirahamwe ry’umupira w’amaguru mu Rwanda Ruboneza Prosper aravuga ko atatangaza abagize aka kanama.

Ruboneza avuga ko aka kanama kagizwe n’abantu bavuye muri Ministere y’umuco na Sports ndetse n’abavuye muri FERWAFA, gusa ngo amazina yabo n’imyirondoro yabo bizatangazwa barangije akazi ko gutoranya umutoza.

Yagize ati “kagizwe n’itsinda rivuye muri Ministere na FERWAFA, ariko amazina tuzayatangaza karangije akazi kako”

Uburyo umutoza atoranywamo bwakomeje kugenda bwibazwaho mu bihe byatambutse, ndetse ubwo Jonathan Mckinstry uheruka gutoza Amavubi yahabwaga akazi hari hashyizweho akanama gashinzwe gutoranya umutoza ariko bamwe baza kukikuramo bavuga ko harimo amanyanga.

Kuri iyi nshuro aka kanama gafite akazi kari kugera ku musozo kuko mu batoza 52 bifuzaga gutoza Amavubi hasigaye abatoza batatu gusa batoranyijwe n’aka kanama kahise kanabahamagaza i Kigali kuwa mbere taliki ya 27 Gashyantare kugirango bakore ikizamini cya nyuma cy’ibazwa(Interview), ubundi hatangazwe umwe uzaba wagitsinze.

Abatoza batatu basigaye bazavamo uzatoza Amavubi harimo Umudage Antoine Hey, umunye- Portugal Jose Rui Lopes Aguas n’umu-Suwisi Raoul Savoy.

Yisangize Inshuti.

Ibitekerezo 1

Tanga Igitekerezo