Abanyarwanda 4 bagiye guhatanira kujya mu ishuri rya FC Barcelona

2

Abanyarwanda bane bari mu bana 50 bo mu karere k’iburasirazuba bagiye kwitabira amajonjora ya nyuma yo gutoranyamo abana bazajya kwiga mu ishuri ryigisha umupira w’amaguru rya Aspire Academy rikorana bya hafi n’ikipe ya FC Barcelona yo muri Espagne, amajonjora azabera mu gihugu cya Kenya.

Aspire Academy ni irerero ry’umupira w’amaguru rifitanye amasezerano n’ikipe ya FC Barcelona rifite icyicaro mu gihugu cya Qatar ndetse na Senegal ku mugabane wa Afurika, na ho mu karere ka Afurika y’Iburasirazuba, iri shuri rifite icyicaro I Nairobi muri Kenya.

Tariki ya 13 Kamena 2016 ni bwo hazaba amajonjora ya nyuma muri aka karere ka Afurika y’Iburasirazuba agamije gushaka abana bazajya mu ishuri rya Aspire Academy, akazebera I Nairobi muri Kenya aho mu bana 50 batoranyijwe kwitabira aya majonjora u Rwanda rufitemo abana 4.

Muri aba bana 4 batoranyijwe gukora injonjora rya nyuma, harimo Emmanuel Tuyisenge ubarizwa muri (Centre Remera Kigali), Ruganguzi Prosper na Niyonkuru Hashim bose ba (Centre Nyamirambo) ndetse na Mucyo Patrick ubarizwa mu irerero rya Rubavu. Uretse u Rwanda rufitemo abana 4, igihugu nka Uganda gifitemo abana 19, Tanzania 13 ndetse na Kenya ifitemo 14.

Kamanzi Haridi, Umuhuzabikorwa ku rwego rw’igihugu mu gushaka abana bajya mu majonjora yo kwerekeza muri Aspire Academy, aganira na Makuruki.rw yadutangarije ko azahagurukana n’abo bana mu mpera z’iki cyumweru berekeza muri Kenya ahazabera ayo majonjora.

Yagize ati”twe turahaguruka kuri uyu wa gatandatu, amajonjora azaba tariki ya 13 Kamena 2016 I Nairobi muri Kenya. Abana bazatsinda bazahita bajya mu ishami rya Aspire riri Senegal na bwo babakorere ijonjora abatsinze bakomeze muri Qatar.”

Abajijwe impavu u Rwanda ari rwo rufitemo umubare w’abana bake muri aka karere k’Iburasirazuba, Haridi yavuze ko u Rwanda ari rwo ruri inyuma ugerereranyije n’ibindi ariko ko barimo kurwana n’icyo kibazo byibuze ibihugu byose bikajya bigira imibare yegeranye kabone n’ubwo ngo itangana.

Aspire Academy yashinzwe mu mwaka wa 2004, intego yayo nyamukuru muri Afurika ikaba ari ugushaka abana bakiri bato kandi bafite impano cyane cyane mu bihugu bikiri mu nzira y’amajyambere.

Iri shuri rya Aspire Academy rimaze kunyuramo abanyarwanda babiri barimo Blaise Itangishaka usigaye ukinira ikipe ya Fc Marines na Iradukunda Barthelemy ukiri muri iri shuri.

Yisangize Inshuti.

Ibitekerezo 2

  1. Abana bato mu Rwanda ni benshi kdi bafite impano igitekerezo cyanjye ni uko mwadushyiriraho amarushanwa mu Turere tukayakina umurenge ku wundi buri wese akisuzuma ayo marushanwa akadutegura muri football, vallyball... Murakoze.

  2. Abana bato mu Rwanda ni benshi kdi bafite impano igitekerezo cyanjye ni uko mwadushyiriraho amarushanwa mu Turere tukayakina umurenge ku wundi buri wese akisuzuma ayo marushanwa akadutegura muri football, vallyball... Murakoze.

Tanga Igitekerezo