Warning: imagejpeg(local/cache-vignettes/L463xH309/arton11174-341ad.jpg.tmp): failed to open stream: Disk quota exceeded in /home/makuruki/public_html/ecrire/inc/filtres_images_lib_mini.php on line 435
AS Kigali bigoranye yegukanye umwanya wa 3 mu gikombe cy’Amahoro .|. Makuruki.rw | Amakuru Asesenguye!

AS Kigali bigoranye yegukanye umwanya wa 3 mu gikombe cy’Amahoro

Umukino wo guhatanira umwanya wa 3 w’igikombe cy’Amahoro wabaye kuri uyu wa mbere tariki ya 4 Nyakanga 2016, wahuzaga ikipe ya AS Kigali na Espoir FC, usize ikipe ya AS Kigali yegukanye umwanya wa 3 ku ntsinzi y’igitego 1-0.

Ni nyuma y’uko amakipe yombi asezerewe muri 1/2 ntabashe kugera ku mukino wa nyuma bityo akaba yagombaga guhatanira umwanya wa 3.

Mu mikino ya 1/2, ikipe ya AS Kigali yasezerewe na Rayon Sports ku giteranyo cy’ibitego 4-3, n’aho Espoir isezererwa na APR FC ku giteranyo cy’igitego 1-0.

Ikipe ya AS Kigali yagiye mu kibuga ari yo ihabwaga amahirwe yo kwegukana umwanya wa 3 ariko batanirengagije ko ikipe ya Espoir FC ishobora kuza kugora AS Kigali nk’uko yabikoze kuri APR FC.

Ibyabaye n’ubundi ntaho bitandukaniye ni byari byitezwe kuko ikipe ya Espoir FC yagoye bigaragara ikipe AS Kigali ari nako amakipe yombi agenda ahusha ibitego maze igice cya mbere kirangira amakipe yombi ntayibashije kureba mu izamu ry’indi.

Igice cya kabiri cyatangiye ubona umukino wahinduye isura ikipe ya AS Kigali ishaka igitego ariko ikipe ya Espoir ikayibera ibamba, ari na ko ikipe ya Espoir isatira izamu rya AS Kigali ariko kureba mu izamu bikanga.

Umutoza Eric Nshimiyimana wa AS Kigali yabonye ko ibyo yari yiteze atari byo ari kubona ku kibuga maze ahagana ku munota wa 70 yinjizamo rutahizamu Sugira Ernest wari wabanje ku ntebe y’abasimbura maze ba myugariro ba Espoir babona akazi katoroshye byatumye ku munota wa 87 Sugira Ernest abonera AS Kigali igitego ari na cyo cyaje gutandukanya impande zombi ikipe ya AS Kigali iba yegukanye umwanya wa 3.

Ikipe ya AS Kigali yegukanye umwanya wa 3 muri iki gikombe cy’Amahoro, yahembwe amafaranga y’u Rwanda angana na miliyoni 1 n’ibihumbi 500.

Hasigaye kumenya ikipe iri butware igihembo cy’irushanwa ikaba iri buve hagati ya APR FC na Rayon Sports zigiye gukurikiraho, aho ikipe iri bwegukane igikombe iri buhabwe amafaranga y’u Rwanda angana na miliyoni 8 mu gihe iya 2 iri buhabwe miliyoni 4.

Canisius KAGABO

MAKURUKI.RW

Yisangize Inshuti.

Ibitekerezo

Tanga Igitekerezo