APR FC yagaruye abakinnyi 4 mu myitozo yo kwitegura Mukura VS

1

Abakinnyi bane ba APR FC bari bamaze iminsi baravunitse byatumye batanatangirana n’abandi shampiyona ubu bamaze kugaruka mu kibuga batangira imyitozo hamwe n’abandi bitegura umukino uzabahuza na Mukura VS muri weekend.

Rugwiro Herve myugariro wo hagati ari muri aba bakinnyi bagarutse mu myitozo, uyu musore ntiyatangiranye n’abandi shampiyona nyuma yo gufasha iyi kipe mu mikino ya gisirikare ndetse akaniyifasha kwegukana igikombe cyo kwitegura shampiyona cyari cyateguwe na AS Kigali batwaye batsinze Vita Club.

Undi mukinnyi wagarutse ni Twizerimana Onesme watsinze igitego cyatumye APR FC itwara icyo gikombe ariko nawe akaba yari yaravunitse ntiyakina umukino APR FC yanganyijemo na Gicumbi FC.

Habyarimana Innocent nawe akaba yamaze gukira nyuma y’igihe kigera ku kwezi yaravunitse, iyi mvune akaba yarayikuye mu mikino yo kwitegura shampiyona. Habyarimana Innocent yaje muri APR FC aguzwe miliyoni 8 avuye muri Police FC mu kwezi kwa 7 uyu mwaka. Irambona Fabrice nawe ntiyari yatangiye shampiyona nawe yagarutse mu myitozo aba bose bakaba bari gufatanya n’abandi kwitegura umukino wa shampiyona bazakina na Mukura.

Imran Nshimiyimana niwe mukinnyi wa APR FC ubu usigaye atarakira we akaba anamaze igihe yaravunitse kuko yavunitse mu mikino ya gisirikare APR FC yakinnye bwa mbere na Ulinzi. Imran nawe yaguzwe avuye muri Police FC miliyoni 8 mu kwezi kwa karindwi nawe.

Yisangize Inshuti.

Ibitekerezo 1

Tanga Igitekerezo