APR FC itsinze Amagaju ikomeza kwanikira Rayon Sports

1

Imikino ya shampiyona yakomeje kuri uyu wa kabiri tariki 8 Kamena 2016 ikipe ya APR FC ikina n’Amagaju, ikaba iyatsinze igitego 1-0, ihita ikomeza kwanikira izindi kipe zirimo na mukeba wayo Rayon Sports.

APR FC yatsinze igitego mu gice cya mbere gitsinzwe na Bigirimana Issa, iki gitego ni nacyo cyarangije umukino APR FC irangiza itsinze igitego kimwe ku busa.

Nyuma yo gutsinda APR FC yahise igira amanota 61 ikomeza kwanikira mukeba wayo Rayon Sports bahanganiye igikombe kuko ihise iyirusha amanota 7 n’ubwo Rayon Sports ifite imikino 2 itarakina.

Undi mukino wabaye uyu munsi, ni uwahuje ikipe ya Espoir yatsinze ikipe ya Rwamagana FC ibitego 2-1. Umutoza wa Espoir Gatera n’ikipe ye bahise bava mu murongo utukura kuko iyi kipe yo mu karere ka Rusizi yahise igira amanota 28, yanikira amakipe nka Rwamagana na Musanze ziyikurikiye.

Gatera Alphonse umukino urangiye yavuze ko yishimye cyane kuko atsinze ikipe bari bahanganye mu myanya y’inyuma kandi ko abona byibuze 70% azaguma mu cyiciro cya mbere.

Kalisa utoza Rwamagana FC we yavuze ko atsinzwe kubera abakinnyi be batumvise neza ibyo yababwiye ariko ko imikino isigaye bagiye kuyitegura neza kuburyo batazamanuka mu cyiciro cya kabiri.

Musanze FC na yo ni ikipe iri mu mazi abira kuko inganyije na Police FC ibitego 2-2, ihita igira amanota 26, aho ikomeje kotswa igitutu n’ikipe ya Rwamagana ifite amanota 23, bivuze ko Musanze iramutse itsinzwe umukino umwe ishobora guhita inganya amanota na Rwamagana.

Musanze isigaje imwe mu mikino ikomeye irimo uzayihuza na APR FC ndetse n’uzayihuza na Rayon Sports amakipe yombi ashaka igikombe cya shampiyona.

APR FC ni yo ikomeje kuyobora urutonde rwa shampiyona n’amanoto 61 igakurikirwa na Rayon Sports ifite amanota 54 na ho AS Kigali na Mukura zigakurikiraho zombi n’amanota 53.

Yisangize Inshuti.

Ibitekerezo 1

Tanga Igitekerezo