APR FC isezereye Bugesera mu gikombe cy’Amahoro nyuma yo kuyinyagira ibitego 5

Ikipe ya APR FC igeze muri 1/2 cy’igikombe cy’Amahoro nyuma yo gusezerera Bugesera ku giteranyo cy’ibitego 5-1 ikaba izahura n’Amagaju yo yasezereye AS Kigali.

Umukino wo kwishyura muri 1/4 mu gikombe cy’Amahoro wahuzaga APR FC na Bugesera urangiye ari ibitego 3 bya APR FC kuri 1 cya Bugesera, umukino ubanza wari warangiye ari 2 bya APR FC ku busa bwa Bugesera, bivuze ko Bugesera isezerewe ku giteranyo cy’ibitego 5-1.

Ni umukino watangiye ubona ko ikipe ya Bugesera ifite inyota yo kwishyura ariko uburyo yagiye irema ntibwagira icyo butanga. APR FC nayo wabonaga ihererekanya ishaka gutsinda.

Byaje kuyisba iminota 37 ngo myugariro wa yo wo ku ruhande rw’ibumoso Mangwende ngo afungure amazamu acenze ba myugariro ba Bugesera ku mupira yari ahawe na Yannick Mukunzi.

Nyuma y’iminota 6 gusa hari ku munota wa 43 Issa Bigirimana yafashe umupira yinjira mu bwugarizi bwa Bugesera ateye umupira mu izamu Kwizera Olivier awukuramo neza cyane ariko habura uwo kuwukura imbere y’izamu Nshuti Innocent ahita atsinda igitego cya kabiri cya APR FC maze n’igice cyabere gihita kirangira.

Igice cya kabiri kigitangira Bugesera yahise ikora impinduka maze Samson Ikechuku aha umwanya Rucogoza Djahadi.

Ni nako kandi Niyonkuru Amani yahaye umwanya Uwacu Jean Bosco.

Igice cya kabiri cyatangiye n’ubundi ubona ikipe ya APR FC ishaka ibindi bitego, ku munota wa 53 Nshuti Innocent yongeye kunyeganyeza inshundura ku mupira yari ahawe na Issa Bigirimana.

Ku munota wa 62 APR FC yakoze impinduka 2 havamo Hakizimana Muhadjiri hinjiramo Eric Tuyishime uzwi nka Congolais, ari na ko kandi Amran Nshimiyimana yahaye umwanya Sekamana Maxime.

Umukino wakomeje APR FC ishaka ibindi bitego ari na ko ikora impinduka, havamo Issa hinjiramo Maxime.

Ku munota wa 78 Manishinwe Emmanuel yasohotse mu kibuga bitewe n’imvune ndetse ntihagira umusimbura kuko APR FC yari yujuje abo igomba gusimbuza.

Ku munota wa 2 w’inyongera Mambo yaboneye igitego cy’impozamarira ikipe ye ya Bugesera.

APR FC ikaba izahura na Amagaju muri 1/2, ni nyuma y’uko iyi kipe isezereye muri 1/4 ikipe ya AS Kigali banganyije ibitego 3-3. Umukino ubanza banganyirije ku kibuga cya Amagaju 1-1, na ho uwo kwishyura banganya 2-2, Amagaju aba ari yo akomeza kuko ariyo yatsinze ibitego byinshi hanze.

Yisangize Inshuti.

Ibitekerezo

Tanga Igitekerezo