APR FC ikipe y’ingabo yavutse ite? yatangijwe nande? Ifite uruhe ruhare mu rugamba rwo kubohora igihugu?

APR FC ni ikipe y’umupira w’amaguru y’ingabo z’igihugu yatangiriye ku rugamba rwo kubohora igihugu itangijwe n’ingabo zari iza RPF zitwaga APR. Iyi kipe benshi bibaza uko yavutse nyamara byari ibihe by’intambara ndetse hibazwa n’icyo yari imaze ku rugamba.

Byusa Wilson Rudifu, umwe mu bayitangiriyemo ayikinira ndetse ari n’umusirikare ubu akaba ari umutoza wayo wungirije ndetse akanatoza abana bayo, yabwiye Makuruki.rw amavu n’amavuko y’iyi kipe ndetse n’akamaro kayo ku rugamba rwo kubohora igihugu

Rudifu yatangiye atubwira uko ikipe yavutse n’uwazanye igitekerezo cyo kuyitangiza.

Ati:"Uko ikipe yavutse, yavutse turi ku rugamba amayuniti (unit) akina ubwayo cyane cyane nibuka y’uko ari twebwe twatangije, yuniti yacu ni yo yatangije gukina bamwe barwana abandi bakina abandi bavamo n’abandi basigaye bakina bakajya kurwana. Dutangira gusaba imikino ya gishuti n’andi mayuniti turakina bigera ahantu ama yuniti ahura yose. Icyo gihe nyakubahwa Perezida wa Repubulika(Paul Kagame warukuriye ingabo za APR icyo gihe) arareba aravuga ngo ko dufite abakinnyi kubera iki tudashyiraho ikipe imwe ngo dukine igahoraho? Ni uko byagenze turajonjora ikipe turayubaka"


Rudifu ubu ni umwe mu batoza b’ikipe ya APR FC nyuma yo kuyikinira ari n’umusirikare

Rudifu avuga ko icyo gihe hari mu gihe cy’amahoro abayobozi babo baragiye gusinya amasezerano y’amahoro muri Tanzaniya I Arusha, maze ngo nabo baboneraho batangira kubaka ikipe bakina imikino ya gishuti itandukanye harimo n’uwo bakinnye n’ikipe ya PSD yari iturutse mu I Kigali ndetse n’ikipe z’abanyamurynago ba FPR ba Kenya ndetse na Uganda.

Ubwo imirwano yasubukurwaga, abasirikare bose bari bagize ikipe ya APR ngo bashyizwe hamwe barwanira hamwe kugira ngo bagumane nk’uko Rudifu akomeza abivuga.

Ati:"Imirwano isubukuwe biba ngombwa ko ikipe iguma ha handi barwana ariko badatandukana, badasubira muri yuniti zabo. Ntitwari tuzi uko byari kugenda kuko twebwe morale twari dufite yari ukurwana no gukina kandi gukina byaduhaga morale cyane yo gutuma tugira na rya shyaka ryo kujya ku rugamba."

Rudifu avuga ko ubwo intambara yarangiraga abakinnyi bose bahise basubizwa ahantu hamwe ikipe igatangira gutyo ndetse abayobozi bagashyiramo imbaraga batangira gushyiramo abakinnyi b’abasivile batari abasirikare kuko ngo abasirikare bayikiniraga abenshi bari bafite imvune ikipe itangira gukomera no gukina amarushanwa y’imbere mu gihugu.

Intego ya APR FC ngo yari iyo gukora ubukangurambaga mu baturage bagamije kubakuramo imyumvire bari batashyizwemo na Leta ko ingabo za FPR atari abantu nk’abandi nk’uko Rudifu na none akomeza abivuga.

Ati:" Twebwe intego yacu kwari gukina n’ubukangurambaga ku baturage kuko Leta yari yarabashyizemo politiki mbi yo kutwangisha abaturage ariko babonye dutangiye gusabana nabo, dukina nabo babona ko turi abanyarwanda nkabo."

Rudifu avuga ko iyi kipe yabateraga morale cyane iri ku rwego rwo hejuru ati:" morale yari nyinshi cyane, cyane kandi navuga nka maganabiri ku ijana(200%) twari dufite morale cyane iri hejuru cyane iturutse muri APR gukina no kurwana icya rimwe byaradufashaga cyane"


Ku mikino ikomeye ingabo z’igihugu zijya zinyuzamo zikaza kwifatanya n’abaturage bakunda iyi kipe kuyifana

Iyi kipe yatangiye ikinamo abasirikare gusa, yageze aho izamo n’abasivile aho Rudifu avuga ko abasivile bayigezemo bwa mbere ari uwitwaga Kavosi ndetse n’uwitwaga Ngoboka.

APR FC imaze imyaka 22 iri mu biganza by’igisirikare cy’igihugu kugeza n’ubu.

Kuri uyu wa mbere tariki ya 4 Nyakanga 2016 APR FC iyi kipe iraba ihanganye na mukeba wayo Rayon Sports zirwanira igikombe cy’Amahoro. APR FC izwiho kutajenjeka muri iki gikombe kuko abayobozi bayo bavuga ko ifite aho ihuriye n’amahoro kuko igisirikare cyayishinze ari cyo yaharaniye kugeza ubu u Rwanda rukaba ruri mu bihugu bifite amahoro n’umutekano bisesuye ku Isi.

Yisangize Inshuti.

Ibitekerezo

Tanga Igitekerezo