APR FC yihimuye Kuri Rayon Sports yegereza kuyigerera mu kebo yayihereyemo

2

Umukino wahuzaga ikipe ya APR FC na Rayon Sports warangiranye n’insinzi y’ibitego bitatu bya APR ku busa bwa Rayon Sports nyuma y’imikino itatu APR yari imaze idatsinda uyu mukeba wayo w’ibihe byose.

Uyu wari umukino wa kimwe cya kabiri cy’irushanwa ryateguwe na AS Kigali ryo gufasha amakipe kwitegura shampiyona.

Ku munota wa 7 gusa ikipe ya APR FC yari yatangiye neza uyu mukino yahise itsinda igitego cya Sibomana Patrick, igitego yatsinze n’umutwe.

Bidatinze ku munota wa 12 APR FC ishyiramo ikindi cyatsinzwe na Bigirimana Issa. Ku buryo bugaragarira buri wese APR FC yarushaga cyane ikipe ya Rayon Sports yakomeje no kuyisatira iyihusha ibindi bitego.

Gusa ariko igice cya mbere cyarangiye kuri ibyo bitego 2 ku busa bwa Rayon Sports.

Igice cya kabiri Rayon Sports yashyizemo Manishimwe Djabel
na Manzi Thierry ikuramo Ishimwe Zappy na Niyonzima Olivier Sefu.

Yahise itangira guhindura umukino na yo itangira gusatira APR FC ariko ku munota wa 61 APR FC yaje kuyiba umugona iyitsinda igitego ku makosa ya Manzi Thierry. Iki gitego cya gatatu cyaciye intege abakinnyi ba Rayon Sports bari batangiye kugaragaza icyizere ko babona igitego.

Umukinnyi Manishimwe Djabel wari wagiyemo asimbuwe yaje kuvunika avamo ndetse na Nahimana Shassir asimburwa na Romami Frank.

Ibi byatumye Rayon Sports itangira kurushwa ndetse itangira gukina yugarira ishaka ko umubare w’ibitego utiyongera.

Umukino waje kurangira kuntsinzi ya APR FC y’ibitego 3 ku busa.

APR FC ibonye iyi ntsinzi nyuma y’imikino 3 yikurikiranya yari imaze idatsinda Rayon Sports.

Umukino ubanza wa shampiyona y’umwaka ushize aya makipe yombi yari yanganyije ubusa ku busa na ho uwo kwishyura Rayon Sports iyitsinda ibitego 4 ku busa. Undi mukino waherukaga kubahuza ku mukino wa nyuma w’igikombe cy’Amahoro Rayon Sports yatsinze igitego kimwe ku busa.

APR FC ku mukino wa nyuma w’iki gikombe izakina na AS Vita Club yo yastinze Kiyovu Sports igitego kimwe ku busa. Naho Rayon Sports ikine na Kiyovu ku mwanya wa gatatu.


Hagati ha APR FC hari hakomeye cyane


Pierrot na Shassiri bakinira Rayon Sports hagati bari baganjwe n’abakinnyi ba APR FC


Ba myugariro ba APR FC bari bari maso cyane


Igice cya kabiri Rayon Sports yagerageje gukina ariko APR FC iranga irayirusha.


Wari umukino w’ingufu cyane


Abayobizi ba APR FC byari ibyishimo gusa igitego cya 3 cyagiyemo batangira gusaba abkinnyi kwishyura 4 batsinzwe muri shampiyona ishize



Ivunika rya Djabel ryakomye mu nkokora Rayon Sports icyizere cyo gutsinda kirayoyoka




Byari ibyishimo kuri APR nyuma y’umukino

Yisangize Inshuti.

Ibitekerezo 2

Tanga Igitekerezo