AMAVUBI arimo abahungu ba Perezida Kagame aguye miswi na Morocco

2

Ian Kagame (wambaye numero 14) umuhungu wa Perezida Kagame yari mu ikipe yakinnye na Morocco mu irushanwa ryo kwibuka

Ikipe y’igihugu y’u Rwanda y’abatarengeje imyaka 20 irimo n’abahungu babiri ba Perezida Kagame, inganyije n’ikipe y’igihugu ya Morocco igitego 1-1 mu mukino wo kwibuka abari aba sportif bazize Jenoside yakorewe abatutsi mu 1994.

Iri rushanwa risanzwe riba buri mwaka aho ryitabirwa n’amakipe arimo ayo mu mahanga aba yatumiwe.

Uyu mwaka hari hitezwe ko rizitabirwa n’ibihugu birimo Repubulika iharanira Demukalasi ya Congo, Uganda, Tanzania, Kenya, Sudani y’epfo na Morocco, gusa habashije kwitabira ikipe ya Morocco andi yo yatangaje ko atazitabira iri rushanwa kubera amikoro make.

Mu mukino wabereye kuri stade Amahoro kuri uyu wa gatandatu tariki 18 Kamena 2016, ikipe y’igihugu y’u Rwanda yanganyije n’ikipe ya Morocco igitego 1-1.

Ikipe y’u Rwanda ni yo yafunguye amazamu, aho ku munota wa kabiri w’igice cya mbere umusore Itangishaka Blaise usanzwe ukinira ikipe ya Marines FC yafunguye amazamu, naho umusore Hicham Boussoufiane akaza kwishyurira ikipe ya Morocco igitego cyatsinzwe ku munota wa 43 w’igice cya mbere.

Amakipe yombi yakomeje gukina ari na ko abakinnyi batandukanye binjira mu kibuga abandi basimburwa, gusa umukino nyir’izina wo ukaba warangiye nta kipe yongeye kureba mu izamu ry’indi.

Mu bakinnyi b’ikipe y’u Rwanda yakinishije muri uyu mukino, harimo n’abahungu babiri ba Perezida wa Repubukila y’u Rwanda Paul Kagame barimo Ian Kigenza Kagame watangiye umukino aza gusimburwa ku munota wa 27 w’igice cya mbere ndetse na murumuna we Bryan Cyizere Kagame winjiye mu kibuga ku munota wa 74 w’umukino asimbuye Djabel Manishimwe usanzwe ukinira ikipe ya Rayon Sports.

Hategekimana Bonheur, Sibomana Arafati, Nsabimana Aimable, Yamini Salumu, Niyonkuru Amani, Manishimwe Djabel, Ntwari Jacques, Niyibizi Vedaste, Itangishaka Blaise, Nshuti Dominique Savio, Kagame Kigenza Ian

Irushanwa nk’iri riheruka kuba umwaka ushize, ryari ryitabiriwe n’amakipe y’u Rwanda, Kenya ndetse na Sudani y’epfo.

Insanganyamatsiko y’uyu mwaka yo kwibuka Jenoside yakorewe abatutsi ku nshuro ya 22 igira iti: “Twibuke Jenoside yakorewe abatutsi, Turwanya ingengabitekerezo ya Jenoside.”


Abakinnyi b’Amavubi n’aba Morocco mu ifoto mbere y’uko umukino utangira


Ian Kagame ahanganye n’abakinnyi ba Morocco/ Photo: Izubarirashe


Ian Kagame (ibumoso) asimbuwe yasanze umuvandimwe we ku ntebe y’abasimburaPhoto: Izubarirashe

Yisangize Inshuti.

Ibitekerezo 2

  1. Ndemeye rwose Peresida wacu yatanze urugero rwiza. Yatugaragarijeko akunda twese abanyarwanda nukuri Imana imuhe umugisha.

Tanga Igitekerezo