99% by’abakinnyi ba APR FC bameze neza mbere y’uko shampiyona itangira

3

Umutoza w’ikipe ya APR FC Rwasamanzi Yve aratangaza ko abakinnyi be hafi ya bose bameze neza kandi bari ku musozo w’imyiteguro yo gutangira shampiyona.

Ku cyumweru tariki ya 16/10/ 2016 ni bwo APR FC ifite umukino wayo wa mbere wa shampiyona y’icyiciro cya mbere cy’umupira w’amaguru mu Rwanda, izaba ikina n’Amagaju kuri stade ya Kigali i Nyamirambo. Umutoza wayo Yve Rwasamanzi mu myitozo yo kuri uyu wa mbere yemeje ko imyiteguro imeze neza mu kiganiro na Isango Star.

Ati:”Imyiteguro iri kugenda neza cyane ndabona abahungu bahagaze neza ndumva nta kibazo. Abasore hafi ya bose nka 99 ku ijana(99%) bameze neza usibye nka babiri bafite ikibazo cy’uburwayi ariko na bo turizera ko bazagaruka umusibo ejo”

Mukunzi Yannick na Rusheshangoga Michael ni bo batakoze imyitozo kuri uyu wa mbere ariko umutoza avuga ko bagaruka vuba bagakomezanya na bagenzi babo urugendo rwo kwisubiza igikombe cya shampiyona.

Mwiseneza Jamal na we yari yongeye kugira ikibazo ubwo yagarukaga mu kibuga bakina na Ibanda ariko yongeye gukira aragaruka mu myitozo.

Rwasamanzi Yve yavuze ko imyiteguro ya shampiyona ayigeze ku musozo kuko ubu ari kwigisha abakinnyi ubwenge bwo gutsinda no kurinda izamu ryabo.

Imikino y’umunsi wa Mbere wa shampiyona:

Kuwa Gatanu tariki ya 14 Ukwakira 2016

• Rayon Sports vs Police (Stade ya Kigali, 18:00)

Kuwa Gatandatu, tariki ya 15 Ukwakira 2016
• Pepiniere vs Mukura (Kicukiro, 15:30)
• Etincelles vs Gicumbi (Umuganda, 15:30)
• Bugesera FC vs Kiyovu SC (Bugesera; 15:30)

Ku Cyumweru tariki ya 16 Ukwakira 2016
• Marines VS Espoir FC (Umuganda, 15:30)
• Sunrise FC vs AS Kigali (Nyagatare, 15:30)
• Kirehe FC vs Musanze FC (Kirehe; 15:30)
• APR FC vs Amagaju (Stade de Kigali; 15:30)

Yisangize Inshuti.

Ibitekerezo 3

Tanga Igitekerezo