Uwineza Clarisse arishimira intambwe yateye nyuma yo kuva mu buraya

Uwineza Clarisse utuye mu mudugudu wa Kalisimbi Akagari ka Kabuga ya kabiri mu murenge wa Rusororo, mu karere ka Gasabo, arashishikariza abakora uburaya kubivamo bagatekereza icyabateza imbere binyuze mu matsinda yo kwiteza imbere bakibeshaho aho kubaho batunzwe no kwicuruza.

Uwineza, avuga ko yakoze uburaya imyaka myinshi kuva mu bwana bwe ariko nyuma akaza kubivamo biturutse ku mushinga wa Tumurere w’umuryango witwa Handcap international urwanya ihohoterwa ryo mu buryo bwose.

Asobanura imibereho yabagamo mu bihe byo gukora uburaya yagize ati: “nakoze uburaya kuva nkiri umwana, ubuzima bw’uburaya ni ubuzima bubabaje, Nabyariyemo abana bane badahuje ba se, baratatana kubera kutabitaho no kunywa ibiyobyabwenge, …”

Avuga ko muri icyo gihe abantu bose bari baramutakarije icyizere, ntawe umucira akari urutega.

Ati: “Iyo ukora uburaya nta muntu ukwitaho, yaba n’ubuyobozi nta Wabasha kukumva areba uri muri ibyo bikorwa, Muri sosiyete iyo ukora uburaya nta muntu uguha agaciro, ukubonye aravuga ati uriya ni ya ndaya, ni wa muntu uhora atwara abagabo b’abandi,…”

Uko Uwineza yaje kuva mu buraya

Uwineza avuga ko umushinga wa Hancap international ari wo watumye ahumura amaso akamenya ko na we hari icyo yashobora afatanyije na bagenzi be.

“Mu kubuvamo twahuye n’uyu muryango Handcap ufatanyje na Tumurere baratwigisha.”

Uwineza avuga ko we na bagenzi be bakoraga uburaya babanje gucika intege bumvise ko uyu mushinga utazabaha amafaranga mu ntoki kuko wo wababwiraga ko uzabafasha gukora ibikorwa byo kwigira bakava mu buraya batabahaye amafaranga mu ntoki.

Ati“Benshi bacitse intege, ariko twaraje baduhuza na bagenzi bacu, badushyira mu matsinda baratuganiriza, tuganira na bagenzi bacu duhuje ibibazo, batwigisha gukorera mu matsinda yo kwiteza imbere, ibiganiro nibyo nari nkeneye kuko n’ubundi amafaranga narayabonaga kandi menshi ariko ntagire icyo amfasha, nari nkeneye kubona umuntu unyegera, akanganiriza, akampumuriza, kandi nkabona ko nitaweho n’abantu nkabona ko nanjye ndi umuntu”

Avuga ko we na bagenzi be batangiye kugenda babyumva bagenda bagabanya ingeso y’uburaya ahubwo bagahurira hamwe mu itsinda bakaganira icyabateza imbere.

“Ubwo turavuga tuti rero mureke tugabanye, niba wazanaga nk’abagabo batatu ukajya uzana umwe, twashyizeho umunsi wo guterana tukaganira, nkumva noneho ibintu byo kujya mu muhanda nabiretse, ubwo dushyiraho gahunda yo gutanga amafaranga 300, n’ijana ry’ingoboka tuzafashisha nka mugenzi wacu bamumennye umutwe kuko twari tutarabireka burundu”

Inzira y’iterambere rya Uwineza

Avuga ko yatejwe imbere n’amafaranga yagujije mu itsinda. Ati: “Nagujije amafaranga ibihumbi 15 mu itsinda, barayamba kuko indaya ngenzi zanjye zaranyizeraga, nemera kujya ntanga inyungu, ndagenda ndayashora ncuruza inkwavu, ntarura abana banjye mbazana mu rugo, mbasubiza mu ishuri,mbasha kwiyishyurira inzu, ubu mfite igishoro cy’ibihumbi ijana n’ubu bahoze bampamagara bambaza inkwavu …”

"....Ubu twakoze imishinga iciriritse, muri rya tsinda, twakomeje kwizigama, ubu dufite igishoro twashatse n’amaseta mu isoko turakora tugatera imbere, ubu buri munsi twizigama 500 kugeza ku bihumbi bibiri bitewe nuko twakoze."


Karangwa Charles, umuyobozi wa Handicap International

Handcap international ifasha abantu bahura n’ihohoterwa ryaba irishingiye ku gitsina, irishingiye ku bumuga, iryo mu muryango ikabafasha kwiteza imbere. Ikorera mu turere twa Gasabo, Rubavu na Rutsiro.

Bafasha abakobwa babyariye iwabo, abakora uburaya, ababaswe n’ibiyobyabwenge, ingo zibana mu makimbirane, …. Ubu muri utwo turere dutatu bafite amatsinda afite abagenerwabikorwa 3,552.

Karangwa Charles uyobora uyu mushinga avuga ko ibikorwa byabo bitanga umusaruro ugaragara kuko abo bahurije mu matsinda abafasha kwishakamo ibisubizo bavuye mu buzima bubi ubu barishimira ko bateye imbere, bakanateza imbere imiryango yabo.

Yisangize Inshuti.

Ibitekerezo

Tanga Igitekerezo