Umujyi wa Kigali watanze Miliyoni 30 ku makoperative yatoranyijwe

Mu rwego rwo guteza imbere abagore baba mu makoperative yitwara neza mu mujyi wa Kigali, umujyi wa Kigali watanze inyongeragishoro ya Miliyoni 30 ku makoperative 12 yatoranyijwe.

Mbere yo guhabwa aya mafaranga abagore baba muri aya makoperative bahuguwe ibijyanye no kuzigama no gukoresha inguzanyo mu buryo bwiza butuma biteza imbere. Bagiriwe inama yo kuzigama amafaranga y’u Rwanda 200 ku munsi muri koperative azabafasha kwikemurira ibibazo mu gihe kiri imbere ariko na buri wese ku giti cye akizigama 100.

Babwiwe ko umuntu atagomba kuzigama kubera ko yasaguye amafaranga ahubwo ko umuntu azigama ibyo yateganyije nkuko ateganya amafaranga yo kugura ibikoresho cyangwa ayo kurihira umwana.

Visi Meya w’umujyi wa Kigali ushinzwe iterambere ry’ubukungu Muhongerwa Patricie yabasabye kuba abafatanyabikorwa mu bikorwa biteza imbere isuku n’isukura mu mujyi wa Kigali kuko isuku ari cyo gicuruzwa cya mbere u Rwanda rufite.

Ati: “ Isuku ubu nicyo kintu twavuga ngo turashoboye kubera ko nta mabuye y’agaciro dufite, ibikorwa by’ubukerarugendo Bihari ni bike cyane ariko isuku yo nibura turayivuga kandi iragaragara, ni uguhozaho rero dusubire mu ngo turebe niba hari ubwiherero, ,….twirinda maraliya n’indwara zose zituruka ku mwanda.”

Batojwe kandi kugira urukundo hagati yabo kugirango birinde icyabacamo ibice ndetse no kugira uruhare mu kwicungira umutekano ushingiye mu ngo birinda ihohoterwa rishingiye ku miryango.

Ati: “Umutekano burya uhera mu ngo haracyari ikibazo mu ngo zacu, abamama basigaye bahohotera abagabo babo ibyo mwarabimenye, iyo tugenda mu tugari no mu mirenge no mu ngo twumva abagabo bavuga ngo abagore babazonze. Nyamuneka bagore, ba mutima w’urugo dusubire ku nshingano.”

Visi Meya Muhongerwa yabashimiye Kwishyira hamwe ababwira ko ari urufunguzo rw’ubukungu kuko imishanga bakora ituma biteza imbere.

Avuga kucyo bagendeyeho bahitamo aya makoperative yagize ati: “Aya mafaranga yahawe amakoperative 12 twatoranije nk’umujyi wa Kigali kuko twagiye tubasura dusanga barimo barakora ariko ugasanga hari aho bataragera kubera ubushobozi bukeya, ubwo rero twaravuze mu bushobozi bw’umujyi wa Kigali duhitamo ko buri koperative tuyigenera Miliyoni ebyiri n’igice zose hamwe ni 30, ariko tukayabaha tumaze kubahugurira icyo tubategerejeho, turashaka ko mu gihe cy’imyaka ibiri bazaba bafasha andi makoperative.”

Nubwo aya mafaranga yatanzwe mu rwego rwo guteza imbere abagore (ba mutima w’urugo), aya makoperative yayahawe si bo bayarimo gusa ahubwo harimo n’abagabo.

Aba bahawe aya mafaranga bazatanga inyiturano ingana n’ayo bahawe nyuma y’imyaka ibiri izafasha andi makoperative kuzamuka.

U Rwanda ruri mu cyumweru cyahariwe amakoperative aho abayabamo hirya no hino mu gihugu bagenda bahabwa amahugurwa ku bijyanye n’imicungire y’umutungo no kunoza imiyoborere y’ayo makoperative kugirango ababere isoko yo kwigira.



Visi Meya Muhongerwa yahuguye abahawe aya mafaranga



Muri aya makoperative harimo n’abagabo

Yisangize Inshuti.

Ibitekerezo

Tanga Igitekerezo