Ese umwanzuro wo guhagarika imikino y’amahirwe si ukwivuguruza kwa MINICOM?

2

Minisitiri w’ubucuruzi n’inganda mu Rwanda Francois Kanimba

Umwanzuro MINICOM yafashe kuri uyu wa 27 Nyakanga 2016 wo guhagarika imikino y’amahirwe uragaragaza kwivuguruza gukomeye kuko yari imaze iminsi micye itangaje ku mugaragaro ko iyo mikino yemewe mu Rwanda ndetse ko nta kibazo na kimwe ishobora guteza kuko ngo bayisuzumanye ubushishozi mbere yo kuyemerera gukinirwa mu Rwanda.

Ni kenshi abaturage bagiye bagaragaza ibibazo n’impungenge bafite ku mikorere n’ingaruka zituruka ku mikorere n’imikoreshereze y’ibyuma bikoreshwa mu mikino y’amahirwe bamwe bakunze kwita Ibiryabarezi ariko Minisiteri y’ubucuruzi n’inganda (MINICOM) ari na yo ifite mu nshingano iyi mikino ikabyamaganira kure.

Itangazamakuru na ryo ryagarutse cyane kuri iyi mikino, aho ryagendaga rifasha aba baturage mu kumvikanisha akababaro kabo, maze ku ikubitiro akarere ka Nyanza gafata iya mbere mu gufata icyemezo cyo guca ibyo biryabarezi ku butaka bwako.

Iki cyemezo cy’akarere ka Nyanza cyamaganywe na Minisiteri y’ubucuruzi n’inganda, ivuga ko ibyakozwe n’ubuyobozi bw’aka karere ndetse n’abandi nkabo, bitemewe n’amategeko.

Icyo gihe umuyobozi w’akarere Ntazinda Erasme mu cyemezo cye yari yagize ati:“....Hari abana bishoraga muri iyo mikino y’amahirwe bakemererwa kuyikina kandi bizwi neza ko nta mafaranga bakorera maze ugusanga bariba iwabo bikabararura...”.

Yakomeje avuga ko Ibiryabarezi “bizongera gukora ari uko ba nyirabyo bagaragaje ibyangombwa by’umwimerere bahawe n’ikigo gishinzwe iterambere mu Rwanda (RDB) kandi hakanubahirizwa amategeko agomba kugenga aho iyo tombora ikorera.

Nubwo ubuyobozi bw’akarere ka Nyanza bwagaragazaga impamvu bufunze iyo mikino, MINICOM yo yavugaga ko ibiryabarezi ntacyo bitwaye, ikanemeza ko ari yo itanga ibyangombwa kandi idashobora kubiha umuntu itabanje kugenzura niba ahantu agiye gukorera ari heza kandi hakaba hatateza umutekano muke.

Ruzibukira Alexis, Umuyobozi mukuru ushinzwe inganda n’ibigo bito n’ibiciriritse muri MINICOM yavugaga ko iyi Minisiteri itazi iby’urugomo bibera ahakinirwa umukino w’ikiryabarezi.

Yagize ati: “Ibyo by’urugomo n’ibijyanye na byo byumvikane ko mu Rwanda hari umutekano usesuye, hari inzego zibishinzwe, nk’uko tubizi twese, umutekano wacu ni ntamakemwa, ibyo rero nkaba ntabizi ni bwo bwa mbere mbyumvise ko habamo urugomo.” Uyu muyobozi yanahamyaga ko abantu bemerera gukora imikino y’amahirwe abakozi ba MINICOM babanza kugenzura niba ahantu bagiye gukorera ari ahantu hadashobora guteza umutekano muke.

Nta n’icyumweru gishize iyi Minisiteri igaragaje ko ibyo biryabarezi byemewe n’amategeko, kuri uyu wa gatatu yasohoye itangazo rivuga ko ibaye ibihagaritse by’agateganyo mu Rwanda hose, ibyo bigaragaza ko ari ukwivuguruza mu gufata ibyemezo kuri iyi Minisiteri.

Bamwe mu baturage bo mu mujyi wa Kigali baganiriye na MAKURUKI na bo bavuga ko batunguwe no kumva abayobozi ba Minisiteri bivuguruza mu byemezo ibintu ngo bishobora gutuma batakaza ikizere bagiriraga aba bayobozi.

Umwe yagize ati: ”Aba sibo ejo bundi bavugaga ko iyi mikino yemewe nta kibazo ifite? Ubuse ni nde uzongera kujya yizera ibyo bavuga? Uku ni uguhuzagurika rwose bajye babanza bashishoze mbere yo kuvuga no gufata ibyemezo.”

Nanone kandi nubwo iyi Minsiteri ifashye uyu mwanzuro, umuntu ashobora kwibaza ikizakurikiraho hagati y’abacuruzaga ibi biryabarezi na MINICOM dore ko bari bafitanye amasezerano y’imyaka 10 bakorera mu Rwanda nkuko bigaragarira kubyemezo bafite bibemerera gukorera mu Rwanda , ibintu na none bishobora guteza ikibazo bikaba byanagera no mu rwego rw’amategeko.

Muneza Ferdinand

MAKURUKI.RW

Yisangize Inshuti.

Ibitekerezo 2

  1. Ibi narabivuze rwose. Ni gute leta yemerera umushoramali gushora frw ye maze ikajya kumubangamira gutya? Aha bigaragara ko leta imeze nka wa muntu umara imyaka atabona ukodesha inzu ye aho amuboneye agafatafata ahubutse. Nayo yasamiye imisoro ntiyashishoza, ibintu bitumvikana!

Tanga Igitekerezo