Nyarugenge: Barataka ubujura bukabije bwatumye batangira guhurahura abanyerondo

Ibiro by’umurenge wa Rwezamenyo/ Photo: Internet

Bamwe mu baturage bo mu Murenge wa Rwezamenyo, mu Karere ka Nyarugenge, baratunga agatoki abashinzwe irondo bazwi ku izina ry’Inkeragutabara, babashinja kutabatabara igihe batewe n’abajura cyane cyane mu masaha y’igucuku, bituma babashyira mu majwi ku kuba nabo babugiramo uruhare.

Aba baturage bavuga ko batanga umusanzu w’umutekano. Uyu musanzu batanga ngo ni na wo uhemba izo Nkeragutabara.

Aba baturage bemera ko aba banyerondo ngo batarinda buri rugo rw’umuturage, ariko bakitsa ku cyo bita gutereranwa na bo mu gihe batewe n’ibisambo, ibintu ngo bikunze kuba cyane muri aka gace bivugwa ko gakunda kurangwamo n’abajura benshi ndetse n’abahungabanya umutekano.

Aba baturage bavuga ko impamvu nyamukuru ubujura n’ibindi bikorwa bihungabanya umutekano ngo bidacika muri aka gace, ahanini ngo biterwa n’uko aba banyerondo usanga birirwa binywera ibiyobyabwenge bikagera nijoro nta mbaraga bafite, ndetse ngo abandi ugasanga birirwa mu kazi kabo gatandukanye gatuma batanabona umwanya wo kuruhuka, bityo ngo bagera mu kazi ko gucunga umutekano ugasanga barasinziriye kubera umunaniro.

Bamwe mu baganiriye na Makuruki.rw baragira bati: "Ni gute umuntu yirirwa mu kazi gasanzwe yagera nijoro ngo ni we uje kurinda umutekano? Bageramo bagahita biryamira bagasinzira bityo bigaha icyuho abaza kutwiba, twanatabaza tukabura udutabara. Nk’ubu nkanjye vuba aha byambayeho nterefona ushinzwe irondo arambwira ngo baraje burinda bucya nta muntu uhageze njye ntababeshye ntabwo nzongera kuyatanga.”

Aba baturage bakomeza bavuga ko kubera ubujura busigaye bwiganje muri aka gace, batabaza ntibatabarwe kandi hari ababishinzwe banabihemberwa, ngo bituma bakeka ko abo banyerondo baba bafite uruhare muri ubwo bujura.

Murasira Ahmed utuye muri aka gace yagize ati: "Ndababwiza ukuri rwose aba banyerondo ni bo batwiba. Hari uwo twakekaga wari ushinzwe abanyerondo mu kagari kacu, twasabye ko ubuyobozi bwamwirukana. Kuva yagenda, ubu dufite agahenge rwose. Ngaho mbwira uburyo watabaza umuntu nkuwo akagutabara? Ni bo batwiba."

Abakora amarondo bo ntibemera ibibavugwaho, bakagaragaza ko ikibazo ari abaturage batanyurwa n’akazi babakorera. Bemeza ko ukurikije uburyo irondo rikorwamo badashobora gusinzira ngo bahe urwaho abajura nk’uko abaturage babikeka.

Ntibemera kandi uruhare rwabo muri ubwo bujura nkuko abaturage babivuga, bakavuga ko ibyo ari ukubasebya bikabije.

Abo twasanze iruhande rw’umurenge wa Rwezamenyo bagize bati “ Twe dushinzwe irondo, turarana n’abasirikare, umutekano uba ari wose. Nta muntu uradutabaza ngo ntitumutabare rwose ibyo ni ukudusebya. ”

Icyakora Mutarugera Dieudonné uyobora Umurenge wa Rwezamenyo aherutse gutangaza ko ubu bujura buhari koko, ariko akavuga ko atari ibya buri munsi. Yemeza ko n’aho bigaragaye ko ari akamenyero bahongera irondo byaba ngombwa bakitabaza polisi.

Mutarugera yagize ati “Iyo bigaragaye gutyo ikibazo tugishyikiriza police kugira ngo ikurikirane kuko iyo bakoze iperereza hari igihe abo bajura bafatwa.”

Umunyamabanga Nshingwabikorwa w’Umurenge wa Rwezamenyo akomeza avuga ko ibikorwa byose bishingira ku mutekano bityo agasaba abaturage gukomeza gutanga amafaranga y’umutekano kuko ngo ari inyungu zabo.

Naho ku bijyanye no kuba abaturage ayobora batabaza ntibatabarwe, uyu muyobozi yavuze ko iki kibazo atari akizi bityo ngo akaba agiye kubikurikirana cyane ko ngo hari urwego rubashinzwe mu mu murenge.

Nta mibare y’abamaze kwibwa cyangwa ibyibwe biramenyekana mu Mujyi wa Kigali, ariko mu duce dutandukanye bamwe mu baturage bavuga ko iki kibazo cy’ubujura kigihari n’ubwo buri kwezi ngo batanga amafaranga y’umutekano ahabwa abarara amarondo.

Muneza Ferdinand

Makuruki.rw

Yisangize Inshuti.

Ibitekerezo

Tanga Igitekerezo