Rwamagana: abamotari barashinja aba sekirite ruswa no kwivanga mu kazi ka polisi

2

Abamotari b’I Rwamagana bavuga ko abasekirite bahawe ishingano zirenze ubushobozi bwabo birimo kwaka permis n’ibindi byangombwa byakwaga n’abapolisi mu gihe mbere bakurikiranaga abishe amategeko abagenga arimo gutanga umusanzu wa koperative .

Aba bamotari bavuga ko abasekirite bitwaza izo nshingano bahawe bakabahohotera ndetse bakanabaka ruswa ibyo bo bita akantu.

Umwe muri abo bamotari Nsengiyumva Gerard yabwiye Makuruki ko imikorere y’abasekirite bahawe ibangamira akazi kabo bitewe n’uko badakora akazi bashizwe hagamijwe inyungu zabo ahubwo barangwa no guhohotera abamotari

Yagize ati "Imikorere y’abasekurite dufite ni mibi muri iki gihe. Amafaranga yarabuze ariko usanga baturenganya badufata bakavuga ngo turabasuzugura kandi nta kosa twakoze bashaka kudukuraho akantu ,ikindi kugira ibyangombwa ku bamotari ntacyo bimaze kuko bitabuza guhanwa nta kosa twakoze.”

Undi mumotari yabwiye Makuruki ko abasekirite batandukira akazi kabo ntibanyurwe n’amafaranga bahembwa.

Yagize ati:” abasekirite baraduhohotera kugeza aho batwaka permis bakaduhimbira amakosa tutakoze. Iyo bagufashe bayigusubiza ariko ubahaye amafaranga kandi batubwira ko bahembwa .Nyamara iyo bagufashe bagasanga ufite ibyangombwa ntibabuza kugushakaho ikosa utakoze bakakubwira ko bakujyana kuri police. Akubwira ko ahakujyana wareba kwishyura ibihumbi 25000 ukabaha 5000 ukagenda aho kugirango utange amafaranga menshi nta kosa wakoze”

Akomeza avuga ko byaba byiza babakuriyeho uburenganzira bafite bwo kureba amakosa ubundi yari asanzwe arebwa na polisi.

Ati:”turasaba ko babakuriraho kureba amakosa asanzwe ahanwa na police kuko badukangisha kutujyana kuri polisi bagamije kudusaba amafaranga tutatinya kuvuga ko ari ruswa kandi urebye uburyo amafaranga yabuze ntitwabona amafaranga duha abamotari.”

Ngarambe Erneste, Perezida wa koperative Ubumwe Motari, imwe mu makoperative abiri abarizwa mu mujyi Rwamagana yavuze ko ibyo bibazo abamotari bavuga ntabyo aramenya.

Yagize ati "Abasekirite bavuga ko baka aba motari permis ntabyo batubwiye ariko ibyo ubundi bemerewe birazwi ariko ntibemerewe gufata permis ngo bayibike kuko bitari mu nshingano. Iyo basanze umumotari wakoze ikosa nko kutagira permis bimenyeshwa polisi ikaba ariyo imuhana ntabwo ibyo bibazo abamotari babitubwiye ariko twabagira inama yo kutwegera bakatumenyesha igihe barenganyijwe."

Twashatse kuvugana na Nkurunziza Perezida wa Koperative Kigabiro Taxi Moto nayo ikorerara mu mujyi wa Rwamagana ari nayo abasekirite bayo batungwa agatoki ariko igihe cyose twahamagaye telefone ye igendanwa ntiyitabye.

Umuvugizi wa polisi ishinzwe umutekano wo mu muhanda CIP Emmanuel Kabanda yabwiye Makuruki ko abamotari bagomba kumenya uburenganzira bwabo igihe abasekirite batandukiriye inshingano zabo

Yagize ati:” Abamotari bazi inshingano z’abasekirite bityo bamenye ko hari inzego bagomba kumenyesha ikibazo cyabo kandi nk’ibyo bya ruswa ni icyaha gihanwa n’amategeko , uwabikora yakurikiranwa n’amategeko mu gihe baba babimenyesheje ababishinzwe.”

Ngabonziza Justin/ Makuruki.rw

Yisangize Inshuti.

Ibitekerezo 2

  1. Andika Igitekerezo Hano Ahubwo Police nibikurikirane kuko abaturage batari aba motori barahashiriye babaka amafr.babakangisha ko nibagera kuri police bishyura amande yibihumbi 50000.

  2. Abo bâ sécurité ahubwo ntibafata abamotar gusa ni utari umumotar baramujujubya bamushakaho amakosa, police ibakurirane naho kuvuga ngo wajya kubaza uburenganzira bwawe obyo bitesha umwanya uwakabaye ari mu kazi ke, utakwambuye aragukerereza.

Tanga Igitekerezo