Rwamagana:Urupfu rw’ukekwaho ubujura rwatumye umuganda usubikwa

Ifoto y’umujyi wa Rwamagana/net

Mu gitondo cyo kuri uyu wa Gatandatu tariki 24 Nzeli abaturage bo mu Mudugudu wa Kabuye mu Kagali ka Cyanya mu Murenge wa Kigabiro (mu mujyi wa Rwamagana) bazindukiye mu muganda batungurwa no kubwirwa ko bagomba kujya gushyingura umusore bivugwa yapfuye ava kwiba.

Umwe mu baturage waganiriye na Makuruki yavuze ko babyutse bajya mu muganda, babajije aho bawukorera babohereza mu rugo rucumbitsemo uwo mugabo bivugwa ko yapfuye ava kwiba.

Yagize ati “Mu gitondo twabyutse tujya mu muganda, twabaza aho ubera bakatubwira ko turi buhurire aho uwo mujura yari acumbitse. Badusabye ko twateranya amafaranga ngo haboneke uburyo ashyingurwa bituma tudakora umuganda.”

Abaturage bavuga ko urupfu rw’uwo muntu rwabaye amayobera kuko yapfuye avuye kwiba, akanapfa atagejeje ibyo yibye mu rugo.

Undi muturage yagize ati “ Ejo ku mugoroba nibwo baduhamagaye batubwira ko Kadogo yapfuye avuye kwiba ,bavuga ko urupfu rwe rwatewe n’ibyo bintu yibye birimo igare n’umufuka w’ibishyimbo. Urumva ko ari ibyo bamuterereje abo yibye kuko banaje gutwara ibyo yari yibye natwe tuzana umurambo we.”

Aba baturage bavuga ko Kadogo yari afite umugore bari bamaranye igihe gito ariko ko batazi aho bakomoka. Umugore we Mumarambeho nawe yatangaje ko atazi aho umugabo we akomoka dore ko bahuye nabwo afunguwe nyuma yo kwiba agafungirwa muri gereza ya Ntsinda.

Nyuma y’masaha agera kuri ane abari baje mu muganda bari mu mpaka zo gushyingura umurambo, bakusanyije ibihumbi umunani basaba uwari umucumbikiye kwishyura amafaranga ibihumbi 25 y’irimbi, maze umuganda barawusubika bajya gushyingura.

Nyiringabo Hamdun, uyobora Umudugudu wa Kabuye yahise aboneraho gusaba abaturage bafite amacumbi kwandikisha abo bacumbikiye dore ko uwo wapfuye ubuyobozi bw’Umudugudu bwatangaje ko butari bumuzi nk’umuturage wabwo.

Kadogo ukekwaho gupfa avuye kwiba bivugwa ko nta mwirondoro we uzwi ndetse n’umugore yagaragaje ko atawuzi, ngo izina yari azi ni Kadogo gusa., kuko nta n’icyangombwa na kimwe kimuranga yari afite.

NGABONZIZA JUSTIN

Yisangize Inshuti.

Ibitekerezo

Tanga Igitekerezo