Rwamagana: Akarere kashimiwe intambwe kamaze gutera mu kwesa imihigo

Polisi y’igihugu iri mu bashimiwe uruhare bagira mu guteza imbere akarere ka Rwamagana

Abayobozi b’inzego zitandukanye mu nzego z’ibanze, abagize inama njyanama y’akarere ka Rwamagana, abafatanyabikorwa b’akarere ndetse n’abahoze bayobora akarere ka Rwamagana bahuriye mu nama ya komite mpuzabikorwa kuri uyu wa gatanu tariki 17 kamena 2016, aho abayitabiriye bagaragarijwe aho akarere kageze mu kwesa imihigo mu ngengo y’imari 2016/2017.

Umuyobozi w’akarere ka Rwamagana Mbonyumuvunyi Radjabu, yavuze ko inama ya komite mpuzabikorwa iterana hagamijwe kungurana ibitekezo no kuganira ku ngamba zafatwa mu guteza imbere igihugu n’abagituye.

Yagize ati “Komite mpuzabikorwa y’akarere ni urwego nyunguranabitekezo hagamijwe iterambere ry’akarere n’ishyirwa mu bikorwa rya gahunda za Leta , aho turebera hamwe tukanasuzuma n’imikoranire y’inzego tukarebera hamwe inzitizi twahuye na zo tukafatira hamwe ingamba hagamijwe iterambere n’imibereho myiza y’abaturage.”

Umwe mu bitabiriye iyi nama Sebashi Elyse wari waturutse mu murenge wa Gahengeri yagize ati “ Akarere ka Rwamagana ni kamwe mu turere dufite amateka y’umwihariko kuburyo turamutse dukoresheje aya mahirwe akarere n’abaturage twabyungukiramo. Dukwiye gutekereza uko twabyaza umusaruro ayo mahirwe tugacuruza ayo mateka bishingiye ku bukerarugendo.”

Abari mu nama bagarutse ku myanzuro 18 yafashwe mu nama iheruka aho ndetse bagaragaza ko imihigo akarere kiyemeje ubu bageze ku kigero cya 91% ishyirwa mu bikorwa, ariko abitabiriye inama bakaba bagaragaje ko hari byinshi bitaranozwa.

Senateri Gakuba Jeanne d’Arc wari umushyitsi mukuru, yavuze ko akarere ka Rwamagana kagerageje kwesa imihigo ugereranyije n’imyaka yashije.

Yagize ati “Mu myaka yashijze akarere ka Rwamagana nta bwo kari mu myanya myiza ariko ubu imihigo uko bigaragara irakorwa neza kandi imihigo yose bari biyemeje ko bagendeye ku ngengo y’imari ya Leta hafi ya yose bashoboye kuyesa. Uretse imihigo isaba abafatanyabikorwa nta bwo yagenze neza ariko uko nabyumvise ibitarakozwe nta bwo ari ubushake buke ahu bwo n’uko ari imishinga isaba kwigwa neza ndetse no kuyikurikirana.”

Abafatanyabikorwa bagize uruhare mu gufasha akarere bashimiwe uruhare rwbo, aho mu bashimiwe harimo Polisi y’igihugu yashimiwe uburyo yafashije abatishoboye haba mu kubafasha muri gahunda ya girinka n’ibindi bikorwa bigamije imibereho myiza y’abaturage abandi bashimiwe harimo na Ineza foundation yahaye akarere isomero ndetse n’ibikoresho bya siporo.

NGABONZIZA Justin

MAKURUKI.RW

Yisangize Inshuti.

Ibitekerezo

Tanga Igitekerezo