Rwamagana: Agoronome arashinjwa gufunga no guca amande abaturage ubuyobozi butabizi

Bamwe mu baturage batuye umurenge wa Munyaga, mu karere ka Rwamagana baratakamba bavuga ko abayobozi barimo Agoronome w’umurenge wa Munyaga ndetse n’abayobozi ku rwego rw’akagari n’umudugudu babafata bakabafungira mu murenge babaziza guhinga imyaka yiganjemo amateke mu rutoki, bityo bakabona ari uguhohotera abaturage kuko mbere yo guhanwa batabanza kubigisha ahubwo ngo bazanwa no kubahana bagamije kwibonera amafaranga gusa.

Abaturage baganiriye na Makuruki.rw bavuga ko muri iyi minsi abayobozi batangiye kujya mu ngo z’abaturage bagamije kureba abahinzi niba hari imyaka bafite mu ntoki bityo ngo uwo basanze yarahinzemo bamuca amande y’ibihumbi 10, utayabonye akajyanwa ku murenge agafungirwa muri salle y’umurenge.

Aba baturage kandi bavuga ko batizeye niba ayo mande bacibwa agera kuri konti y’umurenge kuko bayaha uwo muyobozi (Agronome) witwa Nizeyimana Theogene kandi ngo akaba abasaba kuyamuha mu ntoki.

Umwe mu baturage utarashatse ko izina rye ritangazwa yagize ati “Abayobozi barimo agoronome baramfashe ndetse n’abandi batujyana mu murenge batubwira ko tugomba gutanga ibihumbi icumi tutayatanga bakadufungira mu murenge kugeza tuyatanze, urebye baje gusura ingo kubera ko ngo hari abayobozi b’akarere bazaza kudusura nyamara mu kagari kacu abayobozi ntibigeze batubuza guhinga mu rutoki.”

Yakomeje avuga ko nta bukangurambaga bwigeze bukorwa nkuko izindi gahunda za Leta bazikangurirwa ngo babe bakanga kubikora kuburyo byitwa kunanirana.

Yagize ati “nta bwo abaturage twananiranye ahubwo twatunguwe no kubona abaturage bose bakwira imishwaro bahunga ubuyobozi abandi barwana no kurandura imyaka bahinze mu rutoki kugira ngo batabaca amande cyangwa bakajyanwa ku murenge , njye abandi barahunze ariko njye baramfashe ndayatanga gusa ntangazwa no kuyatanga mu ntoki z’abayobozi.”

Undi muturage yagize ati “abayobozi barantunguye kuburyo badufashemo bakatwiriza ku murenge batuziza ko twahinze amateke n’ibishyimbo mu rutoki kandi batarigeze babitubuza mbere.”

Umunyamabanga Nshingwabikorwa w’akagali ka Rweru kamwe mu tugali abaturage bavuga ko baciwe amande kubera guhinga mu rutoki, Uwiringiye Emmanuel yabwiye Makuruki.rw ko koko bari gusura ingo ariko nta mande baca abaturage.

Yagize ati” n’ubu turasura ingo mu midugugu ariko tugamije kwigisha abaturage nta bwo tugamije guca amande. Twasanze bamwe barahinzemo koko bitewe n’imyumvire yabo mibi, kandi ntabwo tuzi impamvu batumva.”

Nizeyimana Theogene, Agoronome atungwa agatoki n’abaturage yabwiye umunyamakuru wa Makuruki.rw ko nta cyo yavuga ku byo ashinjwa n’abaturage.

Nkerarugaba Janvier, Umunyamabanga Nshingwabikorwa w’agateganyo w’umurenge wa Munyaga nawe yabwiye Makuruki.rw ko igikorwa cyo guca amande abaturage nta cyo azi ndetse ko n’uwo abaturage baha ayo mafaranga atamuzi.

Yagize ati” ntabyo tuzi rwose ese ayo mande bayahaye nde? Kontabure (Comptable) wacu amaze amezi abiri muri konji bityo nta bwo uburyo bayatanzemo buzwi, uretse ko nta muturage duca amande ndetse nta n‘umuturage ugomba guha umuyobozi amafaranga mu ntoki kuko hari konti y’umurenge.”

Uyu muyobozi kandi yavuze ko n’ibyo by’abaturage bavuga ko bafungirwa mu biro by’umurenge kubera ko batatanze amande y’uko bahinze indi myaka mu rutoki ngo nabyo atabizi.

Aba baturage bavuga ko iyo bagejejwe mu murenge ngo barekurwa ari uko wabanje gusinyira ko ugomba kwishyura ayo mande, cyangwa waba uyafite aho ukayishyura kugira ngo wemererwe gufungurwa.

Justin NGABONZIZA

MAKURUKI.RW

Yisangize Inshuti.

Ibitekerezo

Tanga Igitekerezo