Ruswa n’akarengane biracyavugwa muri gahunda zo kwimura abantu kubw’inyungu Rusanjye

1

Abaturage mu mpande zitandukanye z’igihugu baravuga ko bakibangamiwe bikomeye na ruswa ndetse n’akarengane byiyongeraho kwica amategeko agenga gahunda yo kwimura abantu ku mpamvu z’inyungu rusange ahanini bikorwa n’abayobozi b’inzego z’ibanze n’abashinzwe gukora igenagaciro ku bikorwa bizagenerwa ingurane.

Ubushakashatsi bwakozwe n’ihuriro ry’abatanga ubufasha mu by’amategeko [Legal Aid Forum(LAF)] mu mpera z’umwaka ushize wa 2015, bwerekanye ko ibigendanye n’ishyirwa mu bikorwa ry’amategeko agenga kwimura abantu ku bw’ibikorwa bigamije inyungu rusange ngo hakirimo ibibazo bikomeye muri iyi gahunda birimo ruswa, akarengane no kwica amategeko nkana.

Banagaragaza kandi ko mu nzego zitandukanye zifite aho zihuriye na gahunmda yo kwimura abantu hagaragaramo ruswa ku rwego rukabije, ibyo bahuriraho neza n’abaturage bavuga ko iki kibazo gihari koko.

Bamwe mu baturage umunyamakuru wa Makuruki.rw yasanze aho LAF ikorera baje gusaba ubufasha mu by’amategeko bavuga ko bahuye n’ikibazo nk’iki, Bemeza ko ruswa ari ikibazo gikomeye muri iyi gahunda yo kwimura abantu ku bw’inyungu rusange.

Umwe yagize ati: ” Rwose uko utureba aha byatubayeho iyo baje kutubarira, iyo ufite akantu ubahereza ako kanya bakubarira neza bakanaguha amafaranga menshi. Ariko iyo basanze ntacyo uri bubahereze bakubarira uko bashatse, ukazasanga umuntu urusha ubutaka nk’incuro ebyiri ahubwo we agukubye kabiri mu mafaranga y’ingurane.”

Babajijwe abakunze kubaka iyo ruswa kugira ngo bahabwe iyo servise, aba baturage bavuga ko biganjemo abayobozi ba zimwe nzego z’ibanze nk’abakozi b’imirenge n’ uturere, abagenagaciro ndetse bakanavuga ko n’abashinzwe kwishyura na bo baka ruswa mu rwego rwo kugira ngo bihutishe iyi gahunda.

Ubu bushakashatsi buvuga ko aba bagenagaciro bavugwaho ruswa ku kigero cya 26% bayihabwa n’abaturage babarurirwa imitungo yabo kugira ngo ihabwe agaciro kari hejuru y’ako ikwiriye.

Ku rundi ruhande bagaragaza ko inzego zitandukanye zaba iza Leta cyangwa se urundi rwego runaka rushaka kwimura abantu ku bw’inyungu rusange, ngo usanga bashyira igitutu kuri aba bashinzwe kugena agaciro ku mitungo y’abaturage bazimura kugira ngo bayihe agaciro kari hasi.

Umuyobozi ushinzwe ibikorwa mu ihuriro ry’abafasha mu by’amategeko, Frank Mugisha avuga ko hari abagenagaciro bababwiye ko hari ibigo bimwe na bimwe bibasaba guha agaciro gato imitungo y’abaturage, Kenshi ngo ibyo biterwa nuko ibigo bimwe na bimwe biba byarakoze igenamigambi ridakwiye bakazasanga amafaranga bagomba kwishyura abaturage ari menshi ugereranije n’ayo bateganyije mu ngengo y’imari.

Mu rwego rw’amategeko, bavuga ko yanditse neza ariko ibijyanye n’inzira bicamo ngo umuturage yishyurwe akaba ari byo bigomba gusobanuka.banagaragaza kandi ko n’ibiciro abantu bahabwa bitandukanye ugasanga bamwe babahaye menshi abandi babahaye make ugereranyije n’ibikorwa biri aho bimuwe.

Muneza Ferdinand

MAKURUKI.RW

Yisangize Inshuti.

Ibitekerezo 1

  1. Andika Igitekerezo Hano muravuga gutinda kwishyurwa muzeze murebe REG yabariye abaturage mukwezi kwa kane nyamirambo Rugarama kugeza nonaha byaratuyobeye gusa tubahaye kugeza mukawamunani tuzisubira. leta ntigashyireho amategeko nirangiza iyice

Tanga Igitekerezo