RWAMAGANA: Abafatanyabikorwa bashimiwe uruhare rwabo mu kwesa imihigo y’Akarere

Kuba abafatanyabikorwa b’akarere ka Rwamagana bakora ibikorwa byabo bashingiye ku mihigo y’akarere ngo byafashije abaturage mu guhindura imibereho yabo kandi ngo bikazafasha ubuyobozi kwesa imihigo.

Kuri uyu wa gatanu tariki ya 10 Kamena 2016, muri aka karere hashojwe imurikabikorwa ryateguwe n’akarere ka Rwamagana ku bufatanye ry’abafatanyabikorwa bako bibumbuye mu ihuriro ryitwa JAF, aho ryabereye mu murenge wa Kigabiro kuva ku wa kane tariki ya 9 Kamena kugeza tariki ya 10 Kamena 2016.

Muri iri murika bikorwa abaturage basuye imiryango itegamiye kuri Leta n’abandi bafatanyabikorwa basobanurirwa ibikorwa bikorerwa abaturage.

Bamwe mu baturage baganiriye na Makuruki.rw bavuga ko kuva imiryango itegamiye kuri Leta yatangira gukorera ibikorwa byayo ku mihigo, byafashije abaturage kuko yabagejejeho ibikorwa byabafashije mu guhindura ubuzima bwabo.

Umwe mu baturage utuye mu Murenge wa Musha yagize ati: “ Nagize ubuzima bubi bitewe n’uko mama yambyaye nyuma ajya kwishakira undi mugabo ndatotezwa kugeza aho nifuje gupfa biranga. Nyuma ariko naje kujya I Ndera kubera uburwayi bwo mu mu mutwe bwavuye ku gutotezwa n’umuryango wo mama yashatsemo, nyuma umushinga witwa PLAN RWANDA wamfashije kongera kwigirira icyizere cyo kubaho kuko bamfashije kwiga imyunga ,ubu narangije kwiga kuburyo ubu natangiye kudoda imyenda igezweho byatumye ntakiri mu bantu bifuza gufashwa ahubwo nshobora kwikemurira ibibazo byose kandi ubu nifitiye icyizere cyo kubaho.”

Perezida wa Njyanama y’Akarere ka Rwamagana Kabagamba Wilson, yashimye uruhare abafatanyabikorwa bagira mu mihigo y’akarere, kuko ngo bigafasha kuyesa mu buryo bushimishije.

Yagize ati “Turizera ko tuzesa ibihigo kuko ubu uruhare rw’abafatanyabikorwa rushingira ku mihigo y’akarere ka Rwamagana bityo ku bufatanye na bo n’abaturage bizafasha akarere kwesa imihigo. Rwamagana dufite amahirwe kuba dufite agace karimo ubutaka bwera n’ibiyaga bya Muhazi na Mugesera n’andi mahirwe dufite tuzayakoresha hagamijwe iterambere rirambye.”

Umuyobozi wungirije mu kigo cy’igihiugu cy’imiyoborere RGB Munyandamutsa Jean Paul, yagarutse ku ruhare rwa JAF mu iteramere no guhindura imibereho y’abaturage aho yagize ati “Aho mwatangiriye ibikorwa mugendeye ku mihigo mwafashije abaturage kugira imibereho myiza kandi ntibabuze kwigenga kandi bikaba bigaragaza ko byagiriye abanyarwanda akamaro. Leta irabashimira uruhare mugira mu bikorwa bigamije imibereho myiza y’abaturage n’iterambere ry’igihugu.”

Abafatanyabikorwa bagaragaje ibikorwa by’ingirakamaro bakoreye abaturage bahawe amashimwe bitewe n’ibyo bikorwa byabo byabashije guhindura imibereho y’abaturage bakoze.

Justin NGABONZIZA

MAKURUKI.RW

Yisangize Inshuti.

Ibitekerezo

Tanga Igitekerezo