Nyaruguru: Udutsinda tw’ababyeyi bari barwaje bwaki nitwo turi guhashya imirire mibi

Mu karere ka Nyaruguru ababyeyi bahoze bafite abana barwaye bwaki no kugwingira bahurijwe hamwe, ubu nibo ntangarugero mu kurwanya imirire mibi.

Mu mirenge ya Kibeho, Muganza, Ruheru na Nyabimata niho hamaze gukorwa utwo dutsinda , ni udutsinda twahurijwemo ababyeyi bahoze bafite abana bafite imirire mibi.

Abo twaganiriye bo mu murenge wa Kibeho ngo bahurijwe hamwe bigishwa gutegura indyo yuzuye ndetse banafashwa gukora imirimo yabafasha kubona amafaranga yabafasha nk’uko Mushimiyimana Collette ushinze imirire mu kigo nderabuzima cya Kibeho abivuga.

Ati "Twakiriye abana bafite imirire mibi ababyeyi babo tukabigisha gutegura indyo yuzuye, isuku, kuboneza urubyaro, ariko ntitwarangirije aho kuko twasanze ubukene bwaba imbogamizi. Twabahurije muri iyi koperative bakora ibikorwa birimo kuboha imipira bakuramo amafaranga yo kubona uko bagura ibiryo byo gutegura indyo nziza.”

Muri iyi koperative aba babyeyi baboha imipira bakayigurisha mu bigo by’amashuri ari naho bakura amafaranga yo gutegura indyo yuzuye yo kwita ku bana babo. Aba babyeyi batangiye iyi koperative bakoresha ibikoresho bisanzwe nk’ibiti n’amakoroshi ariko ubu bamaze kwigurira amamashini atanu babifashijwemo n’inkunga y’akarere.

Mukabutera Beatrice ukuriye iyi koperative Duharanire Imirire myiza avuga ko byatabaye abana babo bari bagiye kwicwa na bwaki.

Ati "ubundi abana bacu baryaga nabi baranze gukura ariko ntitumenye impamvu ariko nyuma yo kuduhuza baraduhuguye, ubu tuzi gutegura ifunguro ryiza."

Mukabutera avuga kandi ko ibikorwa bakora muri iyi koperative uretse kubafasha kubona amikoro yo gutegura ifunguro ryiza ngo inabafasha kubona amafaranga yo kugura ibindi bakeneye birimo na mitiweli.

MCSP, Umushinga ukora ubukangurambaga bushingiye ku baturage mu kumenya guteka indyo yuzuye no kwita ku buzima uvuga ko waje muri aka karere gukora ubukangurambaga ngo bafashe abaturage kumenya kwitegurira indyo yuzuye.

Dr Musoni Pascal ushinzwe ubuzima bw’ibanze muri uyu mushinga avuga ko abanyarwanda nta kibazo cy’ibiribwa by’intungamubiri bafite ahubwo ngo ikibazo n’imyumvire yo gutegura indyo yuzuye.

Ati "Ubukene si karande nta kibazo cy’ibiribwa abanyarwanda bafite ahubwo ni ikibazo cy’imyumvire ibiryo ntabwo bibuze. Icy’ingenzi ni uguhindura imyumvire bakamenya kandi bagashyira ubushake mu gutegura ifunguro ryuzuye kuko ibiribwa ntibigoye kubibona.”

Karemera Athanase ushinzwe ubuzima muri aka karere ka Nyaruguru avuga ko mu mwaka wa 2012 muri aka karere bari bafite abana bafite imirire mibi bagera ku 2332, naho kugeza ubu bavuga ko akarere kari gukurikirana abana 147 bafite imirire mibi.

Karemera kandi avuga ko ikibazo cya bwaki kiri gukendera muri aka karere ahubwo ngo bagiye gushyira ingufu mu kibazo cyo kugwingira kuko ngo aricyo kigiteye inkeke muri aka karere.

Yisangize Inshuti.

Ibitekerezo

Tanga Igitekerezo