Urwishe ya nka ruracyayirimo, Abazunguzayi baracyataka akarengane mu isoko bahawe Nyabugogo

Meya wa Nyarugenge yari yijeje ko ibibazo by’abazunguzayi bigiye gukemurwa mu mucyo

Mu munsi ishize ni bwo Ubuyobozi bw’akarere ka Nyarugenge n’umujyi wa Kigali bumvikanye ko bagiye gukemura ikibazo cy’abazunguzayi kimaze kuba agatereranzamba mu mujyi wa Kigali hagamijwe guca akajagari bivugwa ko gaterwa n’abakora ubucuruzi bwo mu muhanda ubuyobozi bwita ko butemewe n’amategeko mu Rwanda.

Ingamba zo gukemura iki kibazo zarimo kubashakira aho bakorera hameze neza habafasha kudacururiza mu mihanda y’Umujyi.

Kuva icyo gihe ubuyobozi bwahise butangira kwihutisha imirimo yo kubaka amasoko aciriritse mu duce dutandukanye nk’iruhande rwa gare ya Nyabugogo n’ahandi, agomba gukorerwamo n’aba bazunguzayi mu rwego rwo gushyira mu bikorwa ibyo bari biyemeje.

Kayisime Nzaramba, umuyobozi w’akarere ka Nyarugenge avuga ko ku ikubitiro hubatswe inzu ku bufatanye na UN Women igiye gukorerwamo n’abazunguzayi 60 bibumbiye muri Koperative Dushyigikirane ikorera mu murenge wa Kimisagara.

Meya Nzaramba yavugaga ko bitarenze tariki ya 8 Nyakanga 2016 abazunguzayi ibihumbi 2000 na bo bazaba babonye aho gukorera.

Yagize ati”Nyabugogo ahazwi nko kuri Equity ni abazunguzayi bahihitiyemo. Ni ku muhanda hameze neza hazaba harimo na Parking ku buryo n’uzifuza kubahahira afite imodoka azajya abagana.”

Nubwo ibyo uyu muyobozi yavuze bisa n’ibyatangaga icyizere, bamwe mu bazunguzayi ubu baravuga ko habayemo uburiganya mu gutanga ibibanza muri iri soko bitewe n’uko ngo n’ubundi byahawe abari bafite aho basanzwe bakorera.

Abo twasanze Nyabugogo bagira bati:” Ntibakatubeshye ngo batwitayeho, abantu bafite ibibanza hano muri iri soko ry’abazunguzayi n’ubundi ni abantu bari basanzwe bafite ibibanza kwa Mutanganga, mu Biryogo n’ahandi. Turakubwiza ukuri ntabwo ikibazo cyacu kizigera gikemuka.”

Aba bazunguzayi barasaba ubuyobozi bw’akarere kumanuka bakaza kureba iki kibazo kuko ngo ibyo bibwira ko bakemuye n’ubundi ntaho byagiye, ngo akajagari bumva ko kakemutse ngo na n’ubu kazahora gahari mu gihe hari imikorere nk’iyo.

Ibi bibaye mu gihe umuyobozi w’akarere ka Nyarugenge yari yabijeje ko nta bandi batari abazunguzayi bazaza kubatwara ibibanza kuko bose babaruwe n’imyirondoro yabo ikaba izwi bityo ngo ntawaza avuga ko yari umuzunguzayi kandi atari we.

Iki icyemezo ngo aba bazunguzaji bagisamiye hejuru kuko bavugaga ko nta kizabashimisha nko kuruhuka guhigwa n’inzego zishinzwe umutekano nkaho ari abajura none ngo kuri ubu bababajwe n’uko ibyo bemerewe bitubahirijwe, kuko abahawe ibibanza atari abazunguzayi.

Mugushaka kumenya niba ibyo aba bazunguzayi bavuga ari ukuri, Makuruki.rw yagerageje kuvugisha umuyobozi w’akarere ka Nyarugenge kuri telefoni ye igendanwa kuva ejo ku wa mbere tariki 11 Nyakanga 2016, ariko ntiyabasha kuyifata, tumwoherereje n’ubutumwa bugufi na bwo ntiyabusubiza.

Nyuma yo kubura igisubizo ku muyobozi w’akarere, twavuganye na none n’umuyobozi wungirije ushinzwe imibereho myiza y’abaturage mu karere ka Nyarugenge, Jean Marie Vianney Ndayisenga nawe ntiyagira icyo abivugaho kuko yatubwiye ko ngo bitari mu nshingano ze nubwo ashinzwe imibereho myiza y’abaturage, avuga ko ngo tugomba kubibaza Meya.

Gusa nubwo aba bayobozi ntacyo bavuga kuri iki kibazo cy’ikimenyane mu kugeza gahunda zinyuranye kuri aba bazunguzayi, ntawakwirengagiza iki ari ikibazo aba bazunguzayi bahora bagaragaza bavuga ko izo gahunda akenshi zikunda gushyirwamo abifite nyamara bo zagenewe ntizibagereho, ibintu bavuga ko biri mu bituma batava mu muhanda.

Muneza Ferdinand

MAKURUKI.RW

Yisangize Inshuti.

Ibitekerezo

Tanga Igitekerezo