Nyamagabe: Baratakambira Leta ku bw’akarengane bemeza ko bakorerwa n’abashaka kubimura ku ngufu

Bamwe mu baturage batuye mu kagari ka Kinuma, mu murenge wa Kitabi, mu karere ka Nyamgabe, baravuga ko ubuyobozi bwa Koperative COBACYAMU ihinga icyayi muri ako gace buri kubashyiraho imbaraga z’umurengera ndetse n’ubusumbane mu kubimura aho batuye kugira ngo hahingwe icyayi, bagasaba Leta ko yabafasha mu gukemura icyo kibazo.

Aba baturage bavuga ko ubuyobozi bw’iyi Koperative batunga agatoki mu kubahohotera, ngo usanga iyo baje kubarira abaturage imitungo ngo hari abo usanga babarira ku mafaranga menshi, abandi bakabarira kuri make, ndetse ngo hari n’abo babwira ko nyacyo bazabona ko ahubwo bari kububakira amazu nk’abantu batishoboye bityo ngo bakazayahabwa nk’ingurane.

Nsanzumuhire Jerome umwe muri abo baturage avuga ko habaho ubusumbane bukomeye mu kubimura. Avuga kandi ko bemera ko bagomba kuhava ariko bagasaba ko babarirwa hagendewe ku biciro byashyizweho na Leta.

Yagize ati:” Nk’ubu nkanjye mfite ibihumbi 6378 by’ubuso bw’ubutaka bwanjye, harimo ishyamba, harimo icyayi, harimo n’amazu, ariko ubu barampa milioni enye gusa umbwire nawe!”

Nsanzumuhire na bagenzi be bavuga ko ubuyobozi bw’iyi Koperative ngo bubabwira ko Leta ari yo yategetse ko metero kare imwe igomba kwishyurwa amafaranga 153.

Ku ruhande rw’ubuyobozi bw’iyi Koperative bwo buvuga ko kwimurwa kw’aba baturage ngo ari ubwumvikane hagati yabo n’ubuyobozi bw’uruganda rutunganya icyo cyayi nkuko bivugwa na Nsabimana Pascal, umuyobozi w’inama y’ubutegetsi ya COBACYAMU.

Yagize ati:"Ibintu birimo abantu benshi, buri wese agira uko avuga, ubu abantu bamaze kwimuka hariya ni 90% by’abahatuye, abinangiye rero ntabwo nzi rwose icyo bashaka kuko ntiwavuga ko abantu bose bangana kuriya bagiye kandi bishimye aba bo bakaba batava ku izima.”

Ku ruhande rw’ubuyobozi bw’umurenge wa Kitabi , Ahishakiye Pontien ushinzwe ubutaka imiturire n’ibikorwa remezo muri uyu murenge, avuga ko n’ubundi amazu y’aba baturage aba atubatse kimwe cyangwa yubakishijwe ibikoresho binganya agaciro, bityo ngo no kubabarira ntabwo banganya amafaranga.

Yagize ati:” Namwe murabyumva inzu zitubakishijwe ibikoresho bikomeye kimwe ntabwo zanganya amafaranga. Aba baturage baba bumva babarirwa ku giciro kingana kandi n’imitungo yabo itameze kimwe.”

Uyu muyobozi akomeza avuga ko basabye aba baturage ko uwumva atanyuzwe, yakwegera ubuyobozi bw’umurenge bukamufasha kuburyo bumvikana mu gihe aba baturage bo bavuga ko badashobora kwimuka mu gihe bagihabwa amafaranga bita intica ntikize.

Muneza Ferdinand

Makuruki.rw

Yisangize Inshuti.

Ibitekerezo

Tanga Igitekerezo