Ngororero: Barembejwe n’uburaya n’ubusinzi bikorerwa ahiswe muri Kongo

5

Agasantere ka Kabaya gaturanye n’agace kiswe Kongo

Abaturage bo mu murenge wa Kabaya mu karere ka Ngororero baravuga ko abagabo baho, bajya mu ndaya no kunywa inzoga z’inkorano mu gace kazwi nko muri Kongo, bigatera urugomo rukomeye muri ako gace.

Agace kiswe ’Kongo’ kari mu Murenge wa Jomba mu karere Nyabihu ariko ntiwapfa kubimenya kuko umuhanda wonyine ari wo utandukanya aka gace n’agasantere ka Kabaya.

Abaturage bo mu murenge wa Kabaya baganiriye na MAKURUKI bavuze ko aka
gace ari indiri y’ibi byose bituruka ku nzoga z’inkorano zihacurirwa, hakiyongeraho n’uburaya bwahashinze imizi.

Mukankwiro Beata, umuturage wo mu murenge wa Kabaya avuga ko iyo utubari two ku Kabaya dufunze mu masaha y’ijoro abagabo baho hahita batera intambwe bakigira ahiswe muri Kongo bagakomeza kunywa bagataha basinze.

Yagize ati “Hariya ni muri Leta yigenga, iyo ku Kabaya bafunze bahita bajya muri Kongo bagakomeza kunywa bagasinda, ubundi koko bakwarwana! No mu minsi yashize hari umugabo bakubise baramwica.”

Uretse ubusinzi buba muri Kongo ngo hari n’ikibazo cy’Uburaya bukomeye kuko ngo abagabo bamwe bo ku Kabaya bajya kuhanywera ariko bakurikiye n’indaya zihabarizwa.

Uwitwa Nahimana Assinape yagize ati “muri Kongo hamaze gusenya ingo nyinshi, haba indaya nyinshi ubwo nyine iyo abagabo bamaze kuhasindira bahita bajya no muri izo ndaya.”

Indaya zo muri Kongo ngo zigurisha byibuze guhera ku mafaranga magana atanu kuzamura bitewe n’icyiciro iyo ndaya irimo.

Umunyabanga nshingwabikorwa w’umurenge wa Kabaya Tuyizere Anastase avuga ko ako gace kiswe Kongo kabangamiye umutekano wabo kuko kabarizwamo ibikorwa by’urugomo, ubusinzi ndetse n’uburaya, ibi bikaba biterwa no kuba kari kure y’ubuyobozi bw’umurenge wa Jomba ndetse na polisi yaho, bituma bigorana kuhacungira umutekano buri munsi.

Yagize ati “impamvu muri Kongo hahora ibikorwa bibi kandi natwe bitugiraho ingaruka ni uko hitaruye ubuyobozi bw’umurenge wa Jomba, bituma rero bitwara uko bishakiye.

Tuyizere yongeyeho ko ku bufatanye n’Umurenge wa Jomba wo mu Karere ka Nyabihu, ngo bajya bakora ibikorwa byo kuhafata abacuruza inzoga zitemewe n’ibindi bikorwa by’urugomo kandi ko bigenda bitanga umusaruro.

Yagize at "Tujya dufatanya n’Umurenge wa Jomba mu kurwanya ibyo bikorwa bihungabanya umutekano, ndetse tukanakorana inama, kugeza ubu tubona bigenda bigabanuka kandi dufite ingamba zo kubica burundu.”

Abaturage benshi bavuga ko iryo zina rya Kongo batazi inkomoko yaryo, nubwo hari abavuga ko bituruka ku kuba Abanya-kabaya bahajya bitwaje ko nta muyobozi wo ku Kabaya wabahanira ibyo bakorera muri ako gace kabarizwa mu wundi murenge wo mu karere ka Nyabihu.

Yisangize Inshuti.

Ibitekerezo 5

  1. ni ukubeshya ni akarere ka ngororero kari bgushora itiku nta kongo nta kabaya! kabaya irazwi ko ari iya mbere mu buraya na sida!!!

  2. ni ukubeshya ni akarere ka ngororero kari bgushora itiku nta kongo nta kabaya! kabaya irazwi ko ari iya mbere mu buraya na sida!!!

Tanga Igitekerezo