Ndera: Abayobozi barashinjwa uburiganya no gucuruza inkunga y’ingoboka

Bamwe mu basaza n’abakecuru bo mu muremge wa Ndera, akarere ka Gasabo bari mu kiciro cyo guhabwa amafaranga y’ingoboka baravuga ko batereranywe n’ubuyobozi bw’umurenge wabo, hakiyongeraho no kutabaha amafaranga y’ingoboka kandi bayemerewe icyo bita ihohoterwa kuko ngo batumva impamvu iyo gahunda itabageraho.

Aba baturage bavuga ko ubuyobozi bw’umurenge wabo bwabemereye amafaranga y’ingoboka, ariko kugeza ubu ngo amaso yaheze mu kirere.

Bavuga ko birirwa batakambira ubuyobozi bwabijeje ayo mafaranga ariko kugeza ubu ngo nta gisubizo bajya bahabwa.

Rwakibibi Pio umwe muri abo bageze mu zabukuru, avuga ko ubuyobozi ubwabo aribo bizanye aho batuye, maze babasaba ko bakwiyandikisha kugira ngo bazahabwe ayo mafaranga ariko ngo na we yarategereje araheba.

Yagize ati: ”baraje rwose batangira kutwaka amafaranga ijana ijana ngo y’umusanzu turayatanga, baragaruka bati mujye hamwe tubafotore turabikora, barongera bati igihumbi cyo kugura ifishi y’umuryango turayatanga none na nubu rwose nta gisubizo turabona, ayo mafaranga yose twatangaga yari ay’iki?”

Kuba aba baturage baratswe ayo amafaranga babwirwa ko bagiye gushyirwa mu bahabwa ingoboka bagaheba, ngo babifata nko gucuruza inkunga y’ingoboka.

Baravuga kandi ko batumva impamvu bo ayo mafaranga atabageraho, kandi abandi bo mu mirenge baturanye ngo amafaranga yabo bayabona neza bakibaza abantu ayo mu murege wa Ndera yahawe bikabayobera. Bakomeza bavuga ko batazi impamvu ubuyobozi bwabasabye gufunguza ama konti ngo ayo mafaranga ajye anyuraho barangiza ntibayahabwe, ibyo bita uburiganya bukomeye no kubazirika ku katsi.

Bashimangira ko muri uyu murenge wabo wa Ndera, nta munsi numwe iyi gahunda yo gutoranya abahabwa ingoboka iragenda neza, kuko buri gihe ngo bahora mu makimbirane n’abayobozi babo kuko ngo abayahabwa baba atari bo akwiye guhabwa.

Ibyo aba bavuga ko batishoboye mu murenge wa Ndera bagarukaho, ku rundi ruhande ntabwo babyemeranywaho n’ubuyobozi bwabo, kuko ubuyobozi bw’umurenge wa Ndera bwemeza ko nta muntu numwe wari warenganywa by’umwihariko muri iyi gahunda yo gutoranya abahabwa ingoboka muri uyu murenge.

Nkurayija Emmanuel uhagarariye ubuhinzi n’ubworozi ndetse akaba anafite iyi gahunda mu nshingano ze yagize ati: ”Nta gahunda yihariye y’abageze mu zabukuru iri muri uyu murenge, dukora nkuko n’abandi bose babigenza ayo makuru ntabwo nzi aho bayavanye ubwo byadusaba kubikurikirana.”

Akomeza avuga ko ibijyanye n’amafaranga batswe, gufotorwa ndetse no gufunguza amakonti ko ayo ari amakuru mashya kuri we, avuga ko bagiye gushakisha amakuru ngo hamenyekane uwaba yarashutse abo baturage kuko iyi gahunda y’ingoboka kuyijyamo hari ibikurikizwa, yahamije ko kwakwa amafaranga ndetse n’ibyo byose abaturage bagarutseho bitarimo.

Ubusanzwe inkunga y’ingoboka ihabwa abasaza n’abakecuru bageze mu zabukuru ikanyuzwa muri gahunda ya VUP, igamije gufasha imirenge ikennye kuva munsi y’umurongo w’ubukene.

Muneza Ferdinand

MAKURUKI.RW

Yisangize Inshuti.

Ibitekerezo

Tanga Igitekerezo