Musanze: Ubwumvikane bucye no kuyoboresha igitugu byugarije Koperative y’abanyabukorikori

Akarere ka Musanze ngo kagiye kongera kumvikanisha aba banyamuryango

Bamwe mu banyamuryango bibumbiye mu ma Koperative atandatu agize impuzamakoperative yitwa Duhaguruke/Kora iherereye mu karere ka Musanze, baravuga ko bugarijwe n’ibibazo birimo kuba imigabane shingiro yabo batazi uko ikoreshwa ndetse nugize icyo abaza ku mikoresherezwe yayo ngo agahita yirukanwa.

Aba banyamuryango bavuga ko ibibazo bikomeye bafite ari uko badasobanurirwa uko umutungo wabo ukoreshwa, kwirukanwa ku ugize Icyo abaza ku mikoresherezwe y’umutungo n’itonesha mu itangwa ry’imwe mu misanzu n’imisoro bisabwa Abanyamuryango bigamije guteza imbere Kampani.

Umwe mu banyamuryango b’iyi mpuzamakoperative utashatse ko amazina ye atangazwa ku bw’impamvu z’umutekano, aganira na Makuruki. rw yagize ati"muri iki kigo harimo ibibazo byinshi kandi bimaze igihe, tumaze imyaka myinshi rwose kugeza ubu nta bwo tuzi uko bacunga amafaranga dutanga, kandi noneho washaka kugira n’icyo ubaza umuyobozi wa kampani akakubwira ko yakwirukana kuko dufite benshi yirukanye bazira kugaragaza ibibazo."

Munyarubibi Leonard uyobora Duhaguruke/ Kora avuga ko ibibazo bivugwa muri iki kigo byose birimo gushakirwa ibisubizo. Gusa ariko ku kibazo cy’abamushinja kubategekesha igitugu, avuga ko asanga ari ngombwa ngo kuko iyo abanyamuryango ubabwiye mu mahoro badashobora kukumva.

Munyarubibi yagize ati"ni ibintu bamenyereye kuko iyo ubabwiye mu buryo bwiza ntibemera, ni ibintu bazi ntiwabashobora ukoresheje uburyo bwa demukalasi. "

Aba banyamuryango b’iyi mpuzamakoperative bavuga ko nyuma yo kubona ko umutungo wabo udacunzwe neza ngo bagejeje ikibazo cyabo ku buyobozi bw’akarere ka Musanze maze ngo na bwo bubasaba ko bakwitoramo abagenzuzi ariko ngo hashize amezi asaga atatu bagaragarije ubuyobozi bw’akarere umutungo wanyerejwe ariko ngo ntibwagira icyo bubafasha.

Uwizeyimana Solange wari uhagarariye ubu bugenzuzi aganira na Makuruki. rw yagize ati"ubundi iyi kampani ifite amakonti atanu ariko mu kugenzura ubuyobozi bwatweretse abiri yonyine, ayo yandi atatu ntituzi ikiriho, ku yo twagenzuye na yo twasanze nta mafaranga ariho dusaba ubuyobozi bw’akarere kudufasha ariko kugeza n’ubu nta cyo baradusubiza".

Musabyimana Jean Claude, umuyobozi w’akarere ka Musanze avuga ko ibibazo biri muri kampani ya Duhaguruke/ Kora bishingiye ku kutumvikana hagati y’Abanyamuryango n’imiyoborere mibi.

Meya Musabyimana Jean Claude yagize ati "ikibazo kiri muri Duhaguruke/Kora tuzi ni ikibazo cy’ubwumvikane buke buri mu banyamuryango, twakigiyemo inshuro nyinshi, nari nzi ko aho byari bigeze ubu bumvikanye kugira ngo nibura bakore kampani imwe ikomeye ya Duhaguruke/ Kora tugiye gukomeza kubegera."

Duhaguruke/Kora igizwe n’amakoperative y’abanyabukorikori atandatu, ikaba yibumbiyemo Abanyamuryango basaga 250.

Claver Nyirindekwe

MAKURUKI.RW

Yisangize Inshuti.

Ibitekerezo

Tanga Igitekerezo