Kwamamaza

IMIBEREHO MYIZA

Mukarurinda wonkeje uruhinja rw’amezi 3 akarurokora jenoside yahawe inka y’ineza

Yanditswe

kuya

na

Alexis Musabirema
Mukarurinda wonkeje uruhinja rw’amezi 3 akarurokora jenoside yahawe inka y’ineza

Mu bikorwa bya AERG/GAERG week byabereye mu Karere ka Ruhango kuri uyu wa gatandatu umukecuru Mukarurinda Rose yahawe inka y’ineza ashimirwa ko yarokoye uruhinja rw’amezi 3 akarwosa rugakura ubu akaba yiga muri Kaminuza.

Ibi bikorwa bikorwa n’imiryango ya AERG na GAERG ihuza urubyiruko rwacitse ku icumu rya Jenoside yakorewe abatutsi bimaze kumenyerwa. Ni ibikorwa biba mbere y’icyunamo bigamije gutegura abanyarwanda kwinjira mu cyunamo.

Muri ibi bikorwa uru rubyiruko rwubakira imiryango y’abarokotse jenoside itishoboye bakanabagabira. Batanga kandi inka bise iy’ineza haba ku bantu bagize uruhare mu kurokora abatutsi n’abagize uruhare mu guhagarika jenoside yakorewe abatutsi.

Kuri uyu wagatandatu tariki ya 25 Werurwe 2017, ibi bikorwa byakomereje mu murenge wa Kinazi mu karere ka Ruhango, uru rubyiruko rwakoze igikorwa cyo gusiza ikibanza ruzubakiramo imiryango ibiri ndetse bubaka n’uturima tw’igikoni ndetse banatunganya imibiri yari yarangiritse mu rwibutso rwa Kinazi.

Uretse ibi kandi uru rubyiruko rwanahaye inka y’ineza umukecuru witwa Mukarurinda Rose, uyu mukecuru avuga ko mu gihe cya jenoside ngo umwana w’umukobwa wari mu kigero cy’imyaka 15 yaje mu rugo iwe ahetse uruhinja rw’amezi 3 akabasaba ko babahisha.

Uyu mukecuru n’abahungu be bahise bahisha uwo mwana ndetse Mukarurinda yiyemeza konsa urwo ruhinja ahita akura ku ibere umwana we wari ufite imyaka 2 nyuma yo kubyumvikanaho n’umugabo we.

Uyu mukecuru avuga ko inkotanyi zikigera aho bari batuye yahise aziha uwo mukobwa agasigarana agahinja agakomeza kukitaho gusa ngo nyuma y’umwaka aka gahinja nako yaje kugashyikiriza umuryango nako barakajyana.

Tumubajije icyabimuteye yagize ati:” ni urukundo jye nari nzi ko ibyo bya gahutu, gatutsi n’umwaga atari byo kuko twese twari abantu tuva amaraso amwe, nishimira urukundo. Imana izakomeze idufashe uru rukundo turukomeze abapfuye barapfuye ariko abasigaye bagerageze kubana neza.”

Uyu mukecuru avuga ko uretse kuba aba bana baraje bamusaba kubahisha ngo ntahandi yarabazi, ati:"Ntabwo nari mbazi kubeshya ni icyaha nta n’ubwo nzi igisekuru cyabo nakimenye nyuma tumenyanye mbahaye umwana wabo."

Mukarurinda Rose wahawe inka na AERG na GAERG

Kugeza ubu uyu mwana Parfait Uwineza uyu mukecuru we yamwise Irizabimbuto yiga muri kaminuza muri Kenya naho uyu mukobwa we yitwa Egidie Ingabire ngo atuye l Kigali akaba yarashatse ndetse kuri ubu ngo anafite abana batatu.

Uyu mukecuru avuga ko uretse iyi nka y’ineza yahawe na AERG ndetse na GAERG ngo na sekuru w’uyu mwana yamuhaye inka nyuma ipfuye amwongera indi avuga ko anezerwa iyo abonye aba bana yahishe barabaye intwari bagakora bakiteza imbere.


AERG/GAERG week banashinje ikibanza kizubakwamo amazu azatuzwamo imiryango ibiri.

IBITEKEREZO

  • JONATHAN Yanditse:

    Rwose IMANA IZAHE UWO MUBYEYI IMIGISHA MYINSI

  • Eugene Yanditse:

    Umva mubyeyi Imana izakuyobore mu majya no mu maza kd uri Intwari yu Rwanda, nawe Bazagushyire mu Ntwari

  • tuyishimire epaphrodite Yanditse:

    Mukarurinda Rose Imana izamuhe imigisha ubundi uwo nintwari pe kuko afite umutima wakimuntu ubundi bitunaniziki koko?

  • JOAN Yanditse:

    Yooo gusa ibyo wakoze Imana abe ariyo izaguhemba wa mubyeyi we
    .kubwuwo mutima mwiza wakurangaga muri biriya bihe ngewe bitewe nuko numvaga ko nta muhutu ugira imbabazi.

Tanga igitekerezo


Kwamamaza Car Free Day/ 18/02/2018
INKURU ZAMAMAZA 10-08-2018

ITANGAZO RYA CYAMUNARA

Kwamamaza
Perezida KAGAME avuga ku manyanga mu Iyubakwa rya Hotel ya FERWAFA n’ikibazo cy’abana bo ku mihanda
KAGAME avuga kuri za Mission z’abayobozi zidasobanutse
IBYO ABANYAMAKURU BAVUGA KU IYEGURA RYA Fred MUVUNYI ku buyobozi bwa RMC
Uwari V/Perezida w’Urukiko rw’Urukiko rurinda Itegeko Nshinga/ Burundi
RUNIGA avuga uko bazinjira Congo
Ubutumwa bw’Umuturage kuri Perezida KAGAME
Kwamamaza