Minisiteri y’uburezi ntishira amakenga ukuri kw’imibare y’abana bata ishuri ihabwa

Olivier Rwamukwaya avuga ko batazihanganira umuyobozi w’ikigo utekinika imibare y’abanyeshuri be

Umunyamabanga wa Leta ushinzwe amashuri abanza n’ayisumbuye muri Minisiteri y’uburezi, Olivier Rwamukwaya, aratangaza ko iyi Minisiteri ikemanga ukuri kw’ imibare y’abana bata ishuri itangwa n’ abayobozi b’ibigo, ndetse ngo hakaba hagiye gukorwa igenzura kugira ngo hamenyekane ukuri kwabyo.

Ibi uyu muyobozi yabitangarije mu nama y’ uburezi yaguye ku rwego rw’ Umujyi wa Kigali, yabaye kuri uyu wa kane taliki ya 23 Kamena 2016, aho iyi nama yahuje abafite aho bahuriye n’ uburezi yigaga ku byateza imbere ireme ry’ uburezi, ndetse n’ ibindi byose bifasha abana kugera ku burezi nyabwo.

Rwamukwaya yasabye abari bateraniye muri iyi nama kwirinda gutekinika imibare y’ abana bata ishuri ndetse ko Minisiteri y’ uburezi itazakomeza kwihanganira abakomeza gutanga imibare itari yo kuko baba babikora ku nyungu zabo bwite aho kuba inyungu z’ igihugu ndetse ko abazagaragara muri aya makosa bazabihanirwa hakurikijwe amategeko.

Yagize ati “Iby’ ibanze byagaragajwe n’ ubugenzuzi burimo gukorwa, biragaragaza cyane cyane mu mashuri abanza ko hagiye harimo ikinyuranyo mu mibare abayobozi baba baduhaye muri raporo n’ imibare y’ abana nyakuri dusanga ku ishuri, hari n’ abatagira amakaye yanditsemo abana wamubaza uti none se imibare watanze wayikuye he? Akarya iminwa”

Yakomeje agira ati“Uwo bizagaragara ko nyuma y’ inama nyinshi yagiye agirwa ko kureka kubeshya imibare y’abanyeshuri agamije izindi nyungu zitari iz’ igihugu ahubwo ari ize bwite, azashyikirizwa inzego zibishinzwe abihanirwe n’ amategeko ariko ikizabanza azabanza akurwe ku kazi k’uburezi.”

Muri iyi nama hakaba hagaragajwe ikibazo cy’ ubwikorezi bw’ abana igihe bava cyangwa bajya ku ishuri.

Mu kiganiro cyatanzwe na SP JMV Ndushabandi, umuvugizi wa polisi y’u Rwanda ishami rishinzwe umutekano wo mu muhanda, yagaragaje ko iki ari ikibazo kigomba kwitabwaho kandi kigafatirwa ingamba yaba ari abarezi ubwabo, ababyeyi ndetse n’ inzego nz’ ibanze.

SP Ndushabandi yerekanye ko hari ubwo usanga zimwe mu modoka zitwara abana bava cyangwa bajya ku mashuri inyinshi ziba zitujije ibyangombwa aho usanga ari zo ziteza ibibazo birimo impanuka zishobora guhitana ubuzima bw’ abana, bityo akaba yibikuje ko imodoka zitwara aba bana zigomba kugira ibyangombwa byuzuye kandi zigakurikiranwa n’ abarezi ndetse n’ ababyeyi kugira ngo ubuzima bw’ abana butahatikirira, aho basanze izi modoka zitujije ibisabwa bagahitamo gusesa amasezerano na ba nyir’imodoka.

Iyi nama ikaba yafatiwemo imyanzuro itandukanye irimo ko abayobozi b’ ibigo by’ amashuri bagomba kugenzura niba imodoka zitwara abana zujuje ibisabwa, amashuri yigisha gahunda mpuzamahanga agomba gukurikiza amategeko agenga uburezi mu Rwanda, kuba ikinyarwanda kigomba kwigishwa mu mashuri yose, gutanga imibare y’ ukuri y’ abana bata ishuri, guca imyambarire idahwitse mu bana n’ ibindi.

Iyi nama ikaba yasojwe no gutanga ibihembo ku mashuri yitwaye neza nyuma y’ igenzura ryakozwe ndetse n’ abanyeshuri bahize abandi mu gusoma, kwandika inkuru zitandukanye ndetse no mu biganiro mpaka (Debates).


Hatanzwe ibihembo ku mashuri yitwaye neza

Abanyeshuri batsinze amarushanwa yo gusoma n’ ibiganiro mpaka na bo bahembwe

Inama yaguye y’ uburezi ku rwego rw’ Umujyi wa Kigali ikaba ihuza abayobozi b’ ibigo by’ amashuri abanza n’ ayisumbuye, abayobozi bafite uburezi mu nshingano zabo mu nzego zitandukanye ndetse n’ abandi bafite aho bahuriye n’ uburezi. Iyi nama iba buri mwaka isuzumirwamo ibipimo igihugu cyashyizeho ngo uburezi bukomeze kuba umusingi w’ iterambere.

Evode MWIZERWA

MAKURUKI.RW

Yisangize Inshuti.

Ibitekerezo

Tanga Igitekerezo