MINALOC yasohoye itangazo rihumuriza benshi ku bya Mituweli

1

Dr. MUKABARAMBA Alvera, Umunyamabanga wa Leta ushinzwe Amajyambere Rusange n’Imibereho Myiza y’Abaturage muri MINALOC niwe wasinye kuri iri tangazo

Mu rwego rwo kunoza imitangire ya serivisi no korohereza abaturage kubona amakarita ya Mituweli, Minisiteri y’Ubutegetsi bw’Igihugu (MINALOC) ifatanyije n’Ikigo cy’Ubwiteganyirize mu Rwanda (RSSB) yamenyesheje abanyarwanda amabwiriza agomba gukurikizwa mu kwishyura ubwisungane mu kwivuza.

MINALOC yatangaje ko abanyarwanda bose bagomba kugira uruhare mu bukangurambaga no kwishyura umusanzu wa mituweli bitarenze ukwezi kwa Nzeri 2016, kugira ngo bakomeze kwivuza neza no guhabwa serivisi bakeneye.

Ibi bisa n’ibije bihumuriza abaturage bari bafite ubwoba bw’uko bashobora kutazabona iyi karita ndetse ngo bakaba banahanwa bitewe n’uko ngo ubuyobozi bwabo bwari bwababwiye ko uzarenza uku kwezi kwa munani atarishyura ubwisungane mu kwivuza azabihanirwa, kandi ugasanga bamwe bataka ubushobozi buke.

MINALOC kandi yamenyesheje abaturage bose bafite amakarita ya mituweli kandi barishyuye bakaba bagomba kuyongerera igihe (validation) ko basabwe kuyageza ku buyobozi bw’Akagari barimo, kandi ngo ni naho bazajya bayafatira nyuma yo kongererwa igihe. Iyi minisiteri ivuga ko nta muturage wemerewe kwijyanira ikarita ya mituweli aho mituweli ikorera.

Abaturage bose bifuza ikarita nshya ya mituweli ngo bagomba kujya ku biro by’Akagari bitwaje indangamuntu n’urupapuro bishyuriyeho umusanzu bagomba gutanga kugira ngo umukozi wo ku kagari abafashe kuzuza ifishi ya buri munyamuryango.

Umukozi w’Akagali ni we wenyine wemerewe kugeza ku mukozi ushinzwe mituweli (RSSB) amakarita yose yamaze kuzuzwa n’andi asaba kongererwa agaciro yitwaje impapuro zishyuriweho umusanzu ndetse n’ibindi bya ngombwa aho bikenewe. Nyuma yo gushyirwaho umukono na “cachet/stamp” ya RSSB, amakarita asubizwa Ubuyobozi bw’Akagali kugira ngo ashyikirizwe abaturage.

Hari abaturage kandi bagaragazaga ingorane zo kuba baba kure y’iwabo ari nayo babaruye kandi bafite inzitizi z’ukuntu bazasubira iwabo gutangirayo umusanzu ndetse no gufatirayo ikarita ya Mituweli, gusa iyi Minisiteri yabahumurije ibabwira ko abantu bacumbitse kure y’iwabo kandi bafite impamvu zumvikana bemerewe kwishyurira umusanzu aho baba kandi bagahabwa ikarita ya mituweli bitabaye ngombwa gusubira iwabo.

Mu gihe abanyeshuri cyane abo mu mashuri yisumbuye (biga baba mu bigo) basubiraga ku mashuri, bari baramenyeshejwe ko umunyeshuri wese agomba gusubira ku ishuri yitwaje ikarita ya Mituweli bitewe n’uko ngo bitari byemewe gufatira iyi karita ku kigo bigaho nkuko byari bisanzwe. Ibi byatumye hari abanyeshuri batinda kugera ku bigo by’ishuri bitewe n’uko izi karita zari zitaraboneka, ndetse ngo n’abagiye ngo kwinjira mu kigo bikagorana cyane aho ngo byabaga gombwa ko ababyeyi basaba imbabazi ubuyobozi bw’ikigo ndetse bakemera ko icyumweru gitaha bagomba kuba bajyanye izo karita z’abana babo.

Gusa MINALOC yavuze ko abanyeshuri biga bacumbikiwe mu bigo by’amashuri bigamo bose basabwe kwihutira gusubira ku ishuri batiriwe bategereza kwishyura cyangwa gufatira ikarita ya mituweli iwabo mu rugo, kuko ngo bazishyurirwa mituweli yabo n’ubuyobozi bw’ibigo bigaho nk’uko bisanzwe bikorwa.

Mu rwego rwo kurengera ubuzima bw’abanyarwanda no gutanga serivisi nziza ku banyamuryango, muri uyu mwaka w’ingengo y’imari 2016-2017, ngo umuntu wese uzaba yarangije gutanga umusanzu wa mituweli bitarenze tariki 31/8/2016 azajya yemererwa guhita yivuza bitabaye ngombwa gutegereza iminsi 30 nk’uko byari bisanzwe.

MINALOC kandi ivuga ko iri tangazo ryuzuza iryasohotse ku itariki ya 28 Nyakanga 2016 rijyanye no korohereza abaturage kwishyura imisanzu ya Mituweli, kandi ngo rikaba rikaba riri bumanikwe ahantu hose hahurira abantu benshi.

Yisangize Inshuti.

Ibitekerezo 1

Tanga Igitekerezo