Amikoro yatumye MIGEPROF itubahiriza ibyo yari yasabwe na Leta mu myaka ibiri ishize

Minisitiri Gashumba (iburyo) yavuze ko amikoro yatumye batagera ku byo bari biyemeje

Minisiteri y’Uburinganire n’Iterambere ry’umuryango (MIGEPROF), iravuga ko amikoro make yatumye batabasha gushyira mu bikorwa umwanzuro wari wafatiwe mu nama nyungurana bitekerezo yigaga ku guhangana n’ihohoterwa rishingiye ku gitsina, yari yatumijwe n’Inteko Ishinga amategeko mu mwaka wa 2014.

Ku munsi w’ejo tariki 30 Kamena 2016 ni bwo Inteko Ishinga amategeko yari yatumije inama nyungurana bitekerezo ku kurwanya icuruzwa ry’abantu, ikoreshwa ry’ibiyobyabwenge n’ibisindisha mu rubyiruko n’isano bifitanye n’ihohoterwa rishingiye ku gitsina, ikaba yari ije ikurukira iyabaye tariki 10 Ukwakira 2014 na yo yigaga kuri ibi bibazo.

Ubwo Minisiteri y’Uburinganire n’Iterambere ry’Umuryango yagezaga ku bitabiriye iyi nama uburyo yashyize mu bikorwa imyanzuro yari yafatiwe mu nama nk’iyi yari yabaye tariki 10 Ukwakira 2014, Minisitiri w’uburinganire n’iterambere ry’umuryango Dr Diane Gashumba, yagaragaje ko Minisiteri ayoboye yakoze byinshi mu kurwanya ihohoterwa ariko ahanini bishingiye ku bukangurambaga.

Yagize ati “Twakoze ubukangurambaga inama ikirangira mu kwakira 2014 twise “Family Campaign” ikaba yari ifite insanganyamatsiko igira iti “Uburere buboneye mu muryango ni ingenzi gukumira ihohoterwa rishingiye ku gitsina n’icuruzwa ry’abantu”.

N’ubwo Minisitiri Gashumba yagaragaje ko MIGEPROF hari byinshi yakoze mu gushyira mu bikorwa imyanzuro yari yafatiwe muri iyo nama, yanavuze ko hari umwanzuro batabashije gushyira mu bikorwa ujjyanye no gukora ubushakashatsi bwimbitse bugaragaza imiterere y’ikibazo cy’icuruzwa ry’abantu n’ibindi byaha bifitanye isano, ababikorerwa n’ibibazo bafite ndetse n’ababibashoramo bityo hagafatwa ingamba zo kubikemura mu buryo buryambye.

Minisitiri Gashumba yasobanuriye abadepite, abaminisitiri n’abandi bari bitabiriye iyi nama ko impamvu batashije gushyira mu bikorwa uyu mwanzuro ari uko bahuye n’ikibazo cy’amikoro make.

Yagize ati “ Ba nyakubahwa, uyu mwanzuro ntabwo wabashije gushyirwa mu bikorwa mu buryo bw’ubushakashatsi bwimbitse nk’uko twabisabwaga ibyo bikaba byaratewe n’ikibazo cy’amikoro tutarabasha kubona, tukaba turi gukora ubuvugizi ngo ayo mikoro aboneke.”

Minisitiri Gashumba yavuze kandi ko n’ubwo babuze amafaranga yo gukora ubu bushakashatsi, ngo biyandayanze bagakora ubushashatsi ariko butari bwo neza, bafatanyije n’Inama y’Igihugu y’Abagore babukoreye mu ngo 939.

Yagize ati “Twakoze ubushakashatsi navuga ko atari scientific, aho twafashe imiryango yatoranyijwe tuyishinga Inama y’Igihugu y’Abagore niho navuze ko bagiye mu ngo 939 tukaba tutabifata nk’ubushakashatsi ariko byaduhaye isura y’ikibazo. Twasuze ingo zimwe na zimwe batugarariza za mpamvu 3 (guta indagagaciro, imyumvire ikiri hasi, n’uburwayi bwo mu mutwe)."

N’ubwo Minisitiri Gashumba atagaragaje aho ubuvugizi bwo kubona amafaranga yo gukora ubwo bushakashatsi bugeze, yavuze ko igihe ubushobozi buzabonekera ubushashatsi buzakorwa.

MIGEPROF yagaragaje ko ugucika intege kw’Akagoroba kw’Ababyeyi nabyo biri mu bituma umuryango ukomeza guta indagagaciro.

Kuva mu mwaka wa 2015 kugera mu kwezi kwa Gicurasi 2016 polisi y’u Rwanda yerekana ko hagaragaye ibibazo by’icuruzwa ry’abantu 74. Kugeza ubu polisi y’u Rwanda ikaba imaze kugaruza abagore n’abakobwa bacurujwe mu bihugu by’amahanga cyane cyane muri Uganda bagera kuri 12.

Arsene MUVUNYI

MAKURUKI.RW

Yisangize Inshuti.

Ibitekerezo

Tanga Igitekerezo