"Leta ntabwo isimbura umubyeyi" Min Diane Gashumba

Minisitiri w’Uburinganire n’Iterambere ry’Umuryango Dr Diane Gashumba avuga ko ababyeyi badakwiye kwibagirwa inshingano zabo zo kurera ngo bazirekere Leta, kuko uguteshuka ku nshingano ari byo bikomeje gutuma abana bajya mu mihanda.

Ibi Minisitiri Dr Diane Gashumba yabitangaje kuri uyu wa 08 Nzeri 2016, ubwo ubuyobozi bw’umujyi wa Kigali n’izindi nzego zifite aho zihuriye no kurwanya ubuzerezi zaganiraga n’ababyeyi bafite abana bari mu mihanda n’abajyanywe mu kigo ngororamuco cya Gitagata.

Minisitiri w’Uburinganire n’Iterambere ry’umuryango Diane Gashumba yavuze ko ababyeyi ari bo ba mbere bafite inshingano zo kurera abana babo hanyuma Leta ikaza ibunganira ariko ngo Leta ntigomba gusimbura ababyeyi.

Yagize ati “ twahuye kugira ngo tubaganirize tubibutse inshingano zabo, tubibutse uburenganzira bw’umwana. Leta ntabwo isimbura umubyeyi ariko twumva ibibazo bafite, tugiye gufatanya n’inzego z’ibanze baturukamo kugirango imyumvire yabo izamuke, bumve ko iyo ubyaye umwana uba ufite inshingano yo kumurera. Tugiye gukomeza kubaba hafi kugira ngo ikibazo cyose bafite bumve bagomba kukigeza ku buyobozi bubegereye.”

Minisitiri Gashumba kandi yibukije ababyeyi ko bagomba kwirinda amakimbirane mu ngo dore ko ari byo bikomeje gutuma umubare munini w’abana uta amashuri ukayoboka imihanda.

Yagize ati: “twagerageje kubasobanurira ko niba hari amakimbirane mu rugo umwana ntabwo ari we ingaruka zigomba kubaho nk’uko umubyeyi yabyitangiye mu buhamya, umwana ni umuziranenge, nubwo nta zibana zidakomanya amahembe ariko ntabwo ingaruka zikwiye kujya ku mwana, icyo twakomeje kubigisha ni urukundo mu rugo kubahana ariko bakanubaha n’uburenganzira bw’umwana.”

Turinimana Joseph, umwana wagiye mu muhanda kubera amakimbirane yo mu muryango nyuma akajya kugororerwa i Gitagata, avuga ko umuti wo guca ubuzererezi n’abana bo mu muhanda ari uko ababyeyi bakwirinda amakimbirane.

Ati: “turasaba ababyeyi bacu ko bakumvikana byanashoboka bakaduha inkunga kuko abenshi nta n’akazi baba bafite.”

Minisiteri y’Uburinganire n’Iterambere ry’Umuryango ntiyahwemye kugaragaza ko ikibazo cy’abana bo mu muhanda giterwa n’ababyeyi badohotse ndetse ko hari ibihano bibateganyirijwe nubwo bitaratangira gukorwa kuko ngo icyambere ari ukubanza kwigisha guhana bikaza nyuma.

Akagoroba k’ababyeyi ni imwe muri gahunda yari yitezweho kugira uruhare mu kurandura ikibazo cy’amakimbirane mu ngo ari na yo atera ubuzererezi ariko isa nk’aho yacitse intege igitangira nk’uko Minisitiri Dr Diane Gashumba aherutse kubitangariza abadepite mu nama nyungurana bitekerezo yigaga ku kurwanya ihohoterwa, icuruzwa ry’abantu n’ibiyobyabwenge.

Mu bana bo mu mujyi wa Kigali bajyanywe mu kigo ngororamuco cya Gitagata, akarere ka Gasabo gafitemo abana 53, Kicukiro 5 Nyarugenge 42 ababyeyi babo bakaba barahiriye kongera kubitaho nk’uko bikwiye.

Yisangize Inshuti.

Ibitekerezo

Tanga Igitekerezo